Estudante-sira kolabora malu hamoos faer hosi efeitu inundasaun, sesta (13/03/2020). Imajen/António Gonçalves

DILI, 17 marsu 2020 (TATOLI)- Primeiru-Ministru, Taur Matan Ruak, ohin,  hato’o agradesimentu  ba ekipa konjunta liña ministeriál no ajensia internasionál husi Organizasaun Nasoins Unida (ONU) iha Timor-Leste ne’ebé fó apoiu másimu hodi tulun ba vítima dezastre naturál iha kapitál Dili.

Notísia Relevante : Xanana “Mobiliza” Estudante UNPAZ Halo Limpeza

PM Taur Matan Ruak hamutuk ho Vise Ministra Solidariedade Sosiál no Inkluzaun (MSSI), Signi Verdial ho Sekretáriu Estadu Protesaun Sivíl (SEPS), Alexandrino de Araújo no Diretór Protesaun Sivíl, Ismael Babo, halo vizita ba servisu ekipa konjunta. Imajen/Eugénio Pereira

Xefe Governu hato’o agradesimentu ne’e bainhira hamutuk ho Vise Ministra Solidariedade Sosiál no Inkluzaun (MSSI), Signi Verdial no Sekretáriu Estadu Protesaun Sivíl (SEPS), Alexandrino de Araújo no Diretór Protesaun Sivíl, Ismael Babo, halo vizita ba servisu ekipa konjunta mobiliza apoiu sasán nesesidade báziku no materiál seluk tan ne’ebé prepara hodi fó ba vítima hamutuk 1.700-resin.

“Ha’u fó saudasaun espesiál ba ita nia parseiru dezenvolvimentu, durante ne’e fó sira-nia tempu no rekursu ajuda ita nia povu. Ha’u agradese ba ita-boot sira apoiu ba buat hotu ne’ebé halo hodi ajuda ami-nia povu,”  hateten PM Taur Matan Ruak iha edifísiu SEPS, Caicoli, Dili.

Taur Matan Ruak afirma, Timor-Leste, nasaun foun foin ukun-an halo esforsu tinan 10-resin organiza-an hanesan estadu hodi haforsa no kapasita instituisaun estadu sira para presta servisu di’ak ba sidadaun sira.

Notísia Relevante : La Asesu Bee-Moos, Abitante Becuse Husu SAS Hadi’a Kanalizasaun

Relasiona ho dezastre naturál ne’ebé akontese, Taur Matan Ruak, afirma tan, nu’udar sasukat atu teste kapasidade governu nian ho apoiu parseiru dezenvolvimentu-sira bele koopera no tulun vítima sira sai hosi situasaun dezastre.

“Tempu hirak ne’e ita sukat saida maka ita bele, no saida maka ita labele tuir ita nia kbiit ne’e ba too ne’ebé, tanba ne’e, sai matéria ida importante enkoraja ita nia-an hanesan estadu hodi mellora fó resposta nafatin ba dezastre sira hanesan ne’e,” Taur hateten.

Nia lia-tun tan,  ohin loron dezastre naturál la’ós akontese de’it iha Timor-Leste, maibé akontese mós iha mundu tomak. tanba ne’e presiza duni  kooperasaun no mobiliza malu, oinsá buka fó tulun ba povu ne’ebé sai vítima.

Notísia Relevante : Jenerál Lere Mobiliza Forsa 500-resin Hamoos Fo’er iha Dili

Horiseik too ohin, Taur Matan Ruak halo vizita ba haree direta kondisaun vítima-sira iha Taibesi, Santa Krús no haree povu-nia uma barak hetan estragu no tuir dadus ne’ebé SEPS rekolla vítima hamutuk 1.700-resin presiza hetan apoiu materiál konstrusaun hodi harii fila-fali sira nia uma no apoiu ai-han.

PM Taur agradese SEPS bele mobiliza ekipa Bombeiru hosi Munisípiu Baucau, Aileu, Ainaro, Covalima no Bobonaro, tun hotu ba Dili hodi ajuda ekipa Bombeiru Dili atu rega tahu nurak ne’ebé nakonu iha Jardín Palásiu Prezidensiál no estrada sira iha kapitál Dili.

SEPS  Alexandrino de Araújo hato’o agradese ba PM Taur hodi vizita direita sira-nia fatin hodi rona no haree servisu ekipa konjunta ne’ebé fó apoiu ba vítima dezastre naturál.

Nia dehan, organizasaun ONU nian, inklui Embaixada Indonézia no PERTAMINA Indonézia, ohin, fó apoiu nesesidade báziku oioin ba ekipa konjunta hodi fahe ba vítima afetadu iha kapitál Dili.

PM Taur Matan Ruak halo observasaun direita ba kondisaun karreta Bombeiru kada munisípiu ne’ebé sei ajuda ekipa Bombeiru Dili atu rega  tahu iha estrada kapitál Dili.

Notísia Relevante : PM Taur Observa Direta Área Afetadu Inundasaun

Husu KAFI Hadi’a Emerjénsia Estrada no Ponte

Iha parte seluk, Primeiru-Ministru, Taur Matan Ruak informa, ohin, nia halo enkontru ho Konsellu Administrasaun Fundu Infraestrutura (KAFI) hodi rekolla dadus para fó resposta atu hadi’a emerjénsia estrada, ponte, kanu distribuisaun bee-moos inklui riin eletrisidade ne’ebé aat.

KAFI rasik sei aprezenta sira-nia relatóriu detallu iha reuniaun Konsellu Ministru ne’ebé sei hala’o iha kurta (18/03/2020).

Notísia Relevante : CLN Fó Apoiu Fós Saka 1.000 ba Vítima Inundasaun

Jornalista : Eugénio Pereira

Editór       : Francisco Simões

 

HAKEREK NO HATÁN

Please enter your comment!
Please enter your name here