Vise-Ministra ba Kuidadu Saúde Primáriu, Élia António de Araújo dos Reis Amaral. Imajen Tatoli/Egas Cristovão

DILI, 17 marsu 2020 (TATOLI)-Vise Ministra ba Kuidadu Saúde Primária, Élia António de Araújo dos Reis Amaral, hateten to’o segunda (16/02/2020), Timor–Leste sei kontinua livre hosi infesaun Coronavirus disease ka (COVID-19).

Élia hato’o asuntu ne’e hafoin  aprenzenta ba Deputadu Sira iha Uma Fukun Parlamentu Nasionál ko-naba preparasaun Ministériu Saúde nian hodi halo prevensaun ba coronavirus iha Timor-Leste.

Notísia Relevante :PN Sei Bolu Governu Esplika Preparasaun Fatin ba Prevensaun Coronavirus

Nia informa maske antes ne’e, Ministériu Sáude hamutuk ho Organizasaun Mundiál Saúde (OMS) haruka ona sampel hosi suspeitu ne’ebé deskonfia afetadu ba coronavirus na’in haat ba ospitál Darwin Autrália, maibé rezultadu teste negativu.

Notísia Relevante : Sidadaun Itália Negativu ba Coronavirus

Suspeitu na’in haat ne’e kompostu hosi Sidadaun Itália ida, Vietname, Xíle inklui Timoroan ida no dadaun ne’e sira izola iha idaidak nia uma no hetan akompañamentu hosi Médiku atu kontrola sira-nia movimentu iha rai-laran.

“Ita hatene iha nasaun ida foti medida  rua hanesan kazu emerjénsia no kazu normál se kazu normál ita presiza pasa informasaun ba iha públiku oinsá mak bele halo prevensaun no kontrolu hodi halo visilansia másima,”dehan Vise Ministra Élia, iha Parlamentu Nasionál, segunda (16/03/2020).

Notísia Relevante :Prevene Coronavirus, Governu Halo Preparasaun iha Fatin Tolu

Governu mós hasai ona desizaun atu aplika kuarentena obrigatóriu ba sidadaun hosi nasaun afetadu sira bainhira tama Timor-Leste, tenke izola aan iha ida-idak nia uma maibé hetan kontrolu hosi ekipa médika, FALINTIL-Forsa Defesa Timor Leste (F-FDTL) no PNTL sei akompaña sidadaun hirak ninia movimentasaun iha territóriu.

Notísia Relevante :Voluntáriu 32 Tuir Formasaun ba Prevensaun Coronavirus

Antes ne’e, Governu deside ona Sentru Saúde Bairo Formosa, Sentru Saúde Vera Cruz no Tibar atu sai fatin Kuarentena ba sidadaun afetadu ba coronavirus.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here