DILI, 17 marsu 2020 (TATOLI)-Koordenadór Informasaun Sosiu no Kultura, KBRI Dili, Bangbang Uroanto hateten rezultadu enkontru entre Autoridade sira iha Provínsia Nusa Tenggara Timur (NTT), iha Atambua, iha loron segunda (16/03/2020) seidauk iha desizaun finál hodi taka provizóriu movimentu ema ho sasan iha área fronteira Terrestre Motain, Munisípiu Bobonaro no seluk tan.
“Reuniaun horiseik ne’e laiha desizaun ruma ko-naba movimentasaun iha fronteira rai rua nian, tanba ita haree Timor-Leste dadauk ne’e laiha ema ida mak kona ona Coronavirus ka COVID-19,” relata Bangbang ba Agência TATOLI, iha Embaixada Indonézia Faról Dili, tersa (17/03/2020).
Nia informa movimentu ema no sasan iha fronteira oras ne’e la’o hanesan bai-bain no seidauk taka ba públika atu ultra pasa nasaun rua ne’e iha liña fronteira.
Notísia Relevante :Indonézia Rejeita Taka Fronteira Terrestre
“Atividade iha froteira kontinua la’o nafatin hanesan baibain, maibé iha kontrola makaas hanesan uza mákina hodi haree ema ruma kona COVID -19 ka lae, importante mak kontrola nafatin,” nia dehan.
Bainhira iha ona desizaun ruma hosi Governu Indonézia maka sei komunika ba Timor-Leste hodi konsidera.
Jornalista : Hortencio Sanchez
Editór : Agapito dos Santos
