Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 16 marsu 2020 (TATOLI)—Prezidente Parlamentu Nasionál, Arão Noé de Jesus da Costa Amaral, konsidera preokupasaun Prezidente Tribunál Rekursu (PTR) kona-ba preparasaun Timor-Leste nian antesipa Coronavirus pertinente.

“Sira preokupa sé aban bainrua moras ne’e to’o iha Timor saida mak ita halo tanba prosesu judisiál labele para. Opsaun saida mak ita bele halo hodi rezolve situasaun sira hanesan ne’e. Ha’u hanoin preokupasaun ida-ne’ebé pertinente para ita bele hanoin hamutuk ona oinsá antesipa se to’o mai saida mak ita halo,” Arão Noé informa ba jornalista sira hafoin hasoru malu ho Prezidente Tribunál Rekursu, Deolindo dos Santos, iha Parlamentu Nasionál, segunda ne’e.

Nia dehan, parlamentu sei konsidera preokupasaun ne’e tanba estadu tenke antesipa ba kualkér situasaun ne’ebé mosu.

Nia afirma, se situasaun akontese no rezulta vítima ruma saida mak bele halo, tanba nasaun barak dalan dahuluk mak sira taka ona fronteira, problema Timor-Leste nian mak susar uitoan bainhira taka fronteira no oinsá sirkulasaun hahaan hanesan produtu sira.

“Tanba Timor-Leste dependénsia ba produtu mai hosi rai-li’ur. Ita-nia produtu rai-laran lato’o atu-bele kobre nesesidade bázika Timor-Leste nian, fulan-ida de’it mós ha’u fiar lato’o ida tanba ne’e mak asuntu ida-ne’e tenke hanoin sériu. Oinsá ita prevene para buat ne’e labele alastra, nasaun barak ne’e foti hapara eskola sira, serbisu edifísu públiku sira hotu-hotu paradu,” nia hateten.

Prezidente Parlamentu Nasionál ne’e hateten, kona-ba notísia Indonézia nian fó-sai katak taka fronteira ne’e parese taka ba movimentu ema-nian maibé sirkulasaun sasán la’o nafatin nune’e merkadu labele mamuk.

“Ha’u bele dehan katak 90% ita depende ba produtu rai-li’ur. Sé ita hanoin iha janeiru 2017 kuandu fós para fulan-ida de’it ita iha Dili pániku. Hare-kulit iha foho ita hola hotu maibe la to’o nafatin. Ne’e hatudu katak ita sei dependente maka’as hela ba produtu hosi li’ur tanba ne’e mak desizaun saida mak ita foti tenke kautela ho ita-nia merkadu para labele husik povu pániku liután,” nia dehan.

Arão Noé subliña, sé akontese ba Timor-Leste entaun bele suspende funsionamentu normál órgaun hotu-hotu nian, suspende eskola sira tanba buat sira-ne’e hotu regula ho lei, parlamentu bele halo rezolusaun ou deliberasaun ruma esepsionál la’ós altera maibe suspende de’it aplikasaun lei sira-ne’e iha tempu ida nune’e bele salvaguarda situasaun.

Nia esplika, tuir konstituisaun governu mak hola inisiativa sujere mai parlamentu depois parlamentu aprova no haruka ba Prezidente Repúblika hodi dekreta.

Nia fó ezemplu tau situasaun emerjénsia ho situasaun estadu disítiu maibé depende ba impaktu. Sé maka’as ona tenke foti desizaun ruma nune’e prevene sirkulasaun moras ne’e.

“Se ema ruma sai vítima coronavirus no rezulta mate iha tempu ida, tenke foti desizaun sériu katak tenke hakoi 24 oras, sé bele labele lori ba uma, tenke tau iha mortuáriu no lori direitamente ba rate,”  informa Prezidente Parlamentu Nasionál, Arão Noé.

Notisia Relevante: PTR no PPN Diskute Medida Antesipa Coronavirus

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here