Joventude balun hosi Vila-Verde, Dili, segunda (16/03/2020), taka estrada dirasaun Colmera ba borus Igreja Katedrál Dili, tanba de'it mate-uma ida iha Eskola Ensinu Baziku Filial Vila-Verde nia sorin. Imajen/TATOLI

DILI, 17 marsu 2020 (TATOLI)- Komandu Polísia Munisípiu Dili, dezde sábadu to’o tersa (14-17/03/2020), taka provizóriu estrada protokolu ne’ebé afetadu ba inundasaun iha kapitál Dili, foin lalais ne’e.

Dirasaun estrada ne’ebé taka provizóriu ne’e ho objetivu atu fó espasu ba entidade-sira hamoos tiha tahu-dodok no rai-uut  ne’ebé taka metin estrada.

Dirasaun estrada protokolu  sira ne’ebé daudaun ne’e polísia kontinua taka maka iha área Ponte Palásiu Prezidensiál, Ponte B.J.Habibie too Bidau Mota Klaran, estrada dirasaun Ospitál Nasionál Guido Valadares (HNGV), estrada dirasaun Eskola Rui Sinatti, Balide, Santa Krús,  Likintai-Taibesi, Ponte Maufelu-Becora too Merkadu Antigu no área Eskola 5 de Maiu Becora nian tun too área Eskola STM, Rate Bekusi too Ponte Taibessi nian.

“Ita sei taka provizóriu estrada hirak ne’e tanba ita hatene katak tahu makas no fo’er durante inundasaun ita nia povu barak nia uma mota tama no ita presiza hamoos hotu fo’er sira ne’e, maka foin loke-fali estrada sira ne’e,” informa Komandante PNTL Munisípiu Dili, Superintendente Xefe, Armando Monteiro, ohin, ba jornalista iha Komandu Polísia Munisípiu Dili.

Armando Monteiro husu ba públiku atu kalma no lori karreta no motór halai neineik hodi labele hamosu poluisaun ka rai-rahun atu labele afeta ba ema seluk nia saúde, liu-liu komunidade sira ne’ebé hela besik iha estrada-ibun.

Komandante Armando mós apela ba joven hotu iha área, Vila-Verde atu labele taka estrada ba  dirasaun Igreja Katedrál nia oin, tanba área ne’ebá la tama kategoria afetadu no konsidera estrada prinsipál.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here