Primeiru-Ministru, Taur Matan Ruak. Imajen Tatoli/ Egas Cristovão

DILI, 17 marsu 2020 (TATOLI) – Primeiru-Ministru (PM), Taur Matan Ruak husu ba empreza sira labele manipula folin sasán, liuliu ba fós bainhira nasaun hasoru hela situasaun defísil.

Tuir Xefe Governu, nia parte simu informasaun balun katak empreza sira hahú hasa’e ona folin fós iha munisípiu balun.

“Ha’u apela ba emprezáriu sira labele manipula folin sasán, aproveita oportunidade atu hariku-an, ha’u apela ba sira halo negósiu ho onestu no morál iha momentu ida nasaun presiza sira-nia apoiu. Ida-ne’e maka sira tenke apoia la’ós nasaun presiza apoia, sira prejudika tan ita-nia sidadaun sira. Ha’u hatene iha Lospalos no munisípiu seluk sira komesa halo ida ne’e”, hateten PM Taur hafoin entrega simbolikamente ajudu umanitáriu ba komunidade afetadu Suku Santa Crus, tersa ne’e.

Nune’e, eis Prezidente Repúblika ne’e husu ba kompradór sira atu informa ba autoridade sira bainhira hasoru situasaun negosiante sira manipula presu sasán.

“Laiha nesesidade sira (empreza) atu aproveita situasaun atu manan osan, tanba iha momentu ida-ne’e maka timoroan sira tenke hamutuk. Tanba iha nasaun balun bainhira nasaun hasoru situasaun defísil sira-nia sasán folin hamenus la’ós hasa’e nia folin, tanba hasa’e folin ne’e ajuda atu oho nasaun no oho ita-nia sidadaun”, Xefe Governu adianta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here