Primeiru-Ministru, Taur Matan Ruak entrega apoiu umanitáriu ba vítima inundasaun iha Suku Santa Crus. Imajen Tatoli/Antónia Gusmão

DILI, 17 marsu 2020 (TATOLI) – Primeiru-Ministru (PM), Taur Matan Ruak tun direta hodi entrega simbolikamente ajudu umanitáriu ba komunidade Suku Santa Cruz, Postu Administrativu Nain-Feto, Munisípiu Dili, ne’ebé afetadu ba inundasaun ne’ebé akontese iha sesta (13/03).

Ajudu ne’e nu’udar ajudu emerjénsia, ne’ebé Governu fó hodi hakmaan lalais vítima ninia sofrimentu hodi hein polítika Governu nian atu rekupera filafali estragu ne’ebé komunidade hetan.

Xefe Governu hetan akompañamentu hosi Sekretáriu Estadu Protesaun Sivíl, Alexandrinho de Araújo, Vise-Ministra Solidariedade Sosiál no Inkluzaun, Signi Verdial, no entidade sira seluk.

Antes fahe sasán, PM Taur rona uluk preokupasaun hosi komunidade relasiona ho mosu inundasaun hodi estraga komunidade ninia uma no sasán sira.

Iha intervensaun, Xefe Governu husu ba autoridade lokál sira no komunidade iha Suku Santa Cruz atu serbisu hamutuk hodi halo limpeza, liuliu autoridade lokál sira tenke manifesta solidariedade ba komunidade.

Tuir PM, dezastre naturál hanesan buat ne’ebé ema-hotu la espera atu akontese, tanba ne’e lori Governu tomak nia-naran manifesta solidariedade ba komunidade afetadu.

“Ita hotu la espera buat ne’e akontese, dezastre naturál akontese iha fatin-fatin no bele akontese iha-ne’e (Suku Santa Cruz), akontese mós iha Becusse, Bidau, Kuluhun, no fatin seluk tan. Família barak maka afetadu tanba ne’e ami manifesta solidariedade tomak ba imi no Governu halo esforsu ona hodi fó apoia ruma”, tenik PM Taur iha Suku Santa Cruz, tersa ohin.

Nia salienta, iha kuarta aban sei realiza enkontru Konsellu Ministru no sei deside tan desizaun balun hodi fó atendimentu iha semana-rua mai, maski iha parte seluk Governu agora moris de’it ho orsamentu duodésimu.

“Pior liután Governu laiha orsamentu tanba orsamentu xumba iha Parlamentu. Entaun agora servisu ho orsamentu duodésimu, servisu ho osan natoon kada fulan maibé Governu aban sei deside hodi husu ba Parlamentu atu hetan osan tanba la’ós de’it ba dezastre naturál maibé mós ba Coronavírus ne’ebé sai asuntu globál”, nia akresenta.

Sorin seluk, Xefe Suku Santa Cruz, Marcelino Juvinal lori komunidade afetadu husu ba Governu atu fó apoiu orsamentu ba komunidade tanba komunidade balun halo negósiu hodi sustenta moris, maibé tanba ho dezastre sira lakon buat hotu.

Autoridade lokál ne’e mós agradese ba Governu, liuliu Sekretáriu Estadu Protesaun Sivíl, Alexandrinho de Araújo tanba hafoin dezastre naturál mosu governante ne’e to’o kedas iha fatin.

“Agradese tebes ba apoia sira-ne’e, maibé ami mós husu atu ba oin bele rekupera fali populasaun balun ninia uma ne’ebé estraga. Ida-ne’e maka importante tanba sira barak laiha hela-fatin no seluk maka lakon sasán uma-laran hotu”, nia subliña.

Entretantu, ajudu umanitária ne’e sei kontinua mós ba fatin sira seluk ne’ebé afetadu ba inundasaun hanesan Hera, Bidau Santa Ana, Bidau Lecidere, Bidau Akadiruhun, Becora, Camea, Ailok-Laran, Kuluhun, Audian, Lahane Orientál, Lahane Osidentál, Fatuhada, Vila-Verde, Caicoli no Bairro Pité.

Tuir dadus ne’ebé rekolla hosi Sekretaria Estadu Protesaun Sivíl to’o ohin loron (17/03), vítima afetadu hamutuk uma-kain 2.505 no totál abitante hamutuk 15.799, maibé númeru ne’e sei bele aumenta tanba ekipa sei kontinua halo verifikasaun iha terenu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here