Primeiru-Ministru, Taur Matan Ruak, akompaña husi Ministru Obra Públika, Salvador Soares dos Reis Pires, observa direta ba área afetadu inundasaun. Imajen/Mídia GPM

DILI, 17 marsu 2020 (TATOLI)Primeiru-Ministru (PM), Taur Matan Ruak, apela ba emprezáriu timoroan sira ho transporte ajuda hasai no tula sidimentasaun sira iha mota, hafoin udan ho kuantidade boot no provoka inundasaun iha Kapitál Dili parte Sentru no Leste iha sesta (13/03).

“Ha’u apela ba iha individuál no empreza sira ne’ebé iha karreta, favór ida ajuda fó apoiu ba ita-nia sidadaun atu lori sai fatuk, rai henek no ai-sira ne’ebé iha mota laran”, dehan Xefe Governu hafoin observa direta ba Rekursu Bombeiru iha Caicoli, segunda ne’e.

Tuir eis Prezidente Repúblika ne’e, dezastre naturál la’ós akontese de’it iha país Timor-Leste, maibé akontese iha mundu tomak.

“Ita hotu partikularmente no Instituisaun Estadu tau hamutuk rekursu hodi apoia ita-nia sidadaun afetadu sira”, PM Taur akresenta.

Xefe Governu dehan tan, presiza mobiliza kbiit hamutuk hodi hamoos no regulariza mota-sira liuhosi Iimpeza jerál, tanba ne’e Governu kontinua esforsu ho rekursu ne’ebé iha atu fó asisténsia ba sidadaun afetadu sira.

Tuir dadus husi Sekretáriu Estadu Protesaun Sivíl (SEPS), hamutuk ho liña ministériál no ajénsia internasionál inklui Organizasaun Naun Governentál (ONG) Internasionál no Nasionál sira rejista ona família vítima hamutuk 1.700 no afetadu pesoál hamutuk 6.000-resin.

Entretantu, PM Taur dehan presiza duni Ministériu Obra Públika (MOP), Servisu Água no Saneamentu (SAS) no Eletricidade de Timor-Leste (EDTL) atu hadi’a kanalizasaun bee-moos no eletrisidade, nune’e komunidade bele asesu lalais hodi hein apoia emerjénsia fíziku no naun fíziku.

“Ita tenke regulariza mota-sira hodi hadi’a estrada no kanalizasaun bee-moos tanba prátikamente mota sobu iha fatin barak hodi afeta ba populasaun la asesu bee no eletrisidade. Tanba ne’e presiza intervesaun rápida atu populasaun bele asesu”, nia subliña.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here