Vise Ministra Kuidadu Saúde Primária, Élia A.A dos Reis Amaral ho Reprezentante OMS iha Timor-Leste, Rajesh Pandav Lansa Sentru Operasional Emerjensia Saude.Imajen/TATOLI: Felicidade Ximenes.

DILI, 17 marsu 2020 (TATOLI)Atu fó asisténsia ba vítima dezastre naturál no suspeitu afetadu ba Coronavirus ka COVID-19 iha Timor-Leste, tersa (17/03/2020), Ministériu Saúde hamutuk ho Organizasaun Mundiál Saúde (OMS) lansa ona sentru operasionál emerjénsia Saúde ne’ebé lokaliza iha Diresaun Nasionál Ospitalár no Emerjénsia Caicoli Dili.

Sentru Operasionál Emerjénsia Saúde ne’e lansa direta hosi Vise Ministra Kuidadu Saúde Primária, Élia A.A dos Reis Amaral ho Reprezentante OMS iha Timor-Leste, Rajesh Pandav.

Governante dehan,kualker kazu emerjénsia ne’ebé relasaun ho dezastre naturál no surtu COVID-19, ekipa servisu ne’ebé involve multisetoriál tenke ativu liután no mós kria kooperasaun ida di’ak hodi atende kazu hirak ne’e.

“Ministériu Saúde agradese ba Organizasaun Mundiál Saúde tanba sei kontinua koopera nafatin hodi responde emerjènsia médika iha Timor-Leste,”katak Vise Ministra Élia, iha Caicoli tersa (17/03/2020).

Iha fatin hanesan Diretora Jerál Prestasaun Saúde, Odete Viegas da Silva, hateten sentru ne’e sei atende kazu emerjénsia sira ne’ebé liga ho Dezastre Naturál no Coronavirus iha Munisípiu to’o Nasionál.

Nia informa, OMS no UNICEF maka apoiu ekipamentu hodi tulun funsionamentu sentru operasionál emerjénsia Saúde. Maibé Diretóra ne’e la esplika detaillu tipu ekipamentu hirak ne’e.

“Ekipamentus ne’e belé uza maibé informasaun ne’ebé husi baze ne’e bele hato’o mai iha sentru saúde emerjénsia ida ne’e maibé sentru saúde emerjénsia ne’ebé estabelesidu ne’e aban bain rua sai autónomu ida hanesan HNGV, SAMES, INS, no Laboratóriu Nasionál maibé servisu ne’e agora daudaun ita hala’o ona,”katak Odete.

Ministériu Saúde sei uza fatin ne’e hodi halo enkontru trimestrál ho liña ministeriál liga ba kazu emerjénsia sira hanesan dezastre naturál no Coronavirus.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here