Estudante eskola 5 de maiu, kee fali sira nia kadeira nebe rai taka hafoin hetan inundasaun iha dia 13 Marsu wainhira udan boot akontese.Imajen/Antonio Goncalves

DILI, 17 marsu 2020 (TATOLI)–Ministra Edukasaun Juventude no Desportu (MEJD), Dulce de Jesus Soares, iha tersa (17/03/2020), fó ona orientasaun ba funsionáriu hodi halo limpeza liuliu hamoos fo’er no tahu iha eskola afetadu inundasaun hamutuk 11, iha Munisípiu Dili, hafoin akontese udan boot iha sesta (13/03/2020).

Diretór Nasional Patrimóniu Lojístika Informátika, Marito Soares, ba Agência TATOLI, iha Eskola Sekundária 5 de Maio Becora hateten, funsionáriu hirak-ne’e maihosi Diresaun Patrimóniu Lojístika, Diresaun Infraestrutura, Parseiru Ensinu Sekundáriu Jerál Tékniku Vokasionál no seluk tan.

Notísia Relevante :Inundasaun Estraga Eskola Tolu iha Dili

“Ami sei fó apoiu tomak ba eskola sira-ne’e to’o sira-nia prosesu ensinu aprendizajen iha eskola afetadu sira ne’e to’o funsiona normál filafali,” dehan diretór ne’e.

Nia hatutan, ekipa servisu ne’e fó atensaun makaas liu ba Eskola sekundária 5 de Maio Becora no Eskola Bázika Filiál Akanunu Hera tanba hetan estragu grave, enkuantu eskola sia seluk la grave.

Notísia Relevante :Prosesu Aprendizajen iha Eskola 5 Maiu Becora Paradu

Daudaun ne’e ekipa hamutuk ho dirijente no Estudante 5 de Maiu, konsege suru sai ona rai-henek no tahu hamutuk sala neen. Maibé sala haat seluk presiza hetan apoiu ekipamentu pezada hosi Ministériu Obra Públika hodi suru sai rai-henek hirak-ne’e.

“Kondisaun iha sala haat ne’e nakonu ho rai henek depois kondisaun infraestrutura husi uma kakuluk no moru eskola nian rahun no naksobu hotu, entaun presiza eskavatór hodi bele apoiu servisu ida ho lalais liután,”dehan Nia.

Jornalista : Tomé Amado    

 Editór     : Agapito dos Santos

HAKEREK NO HATÁN

Please enter your comment!
Please enter your name here