Komandante PNTL Munisípiu Dili, Superintendente Xefe Armando Monteiro. Imajen/Eugénio Pereira

DILI, 17 marsu 2020 (TATOLI)- Konfrontu entre juventude sira iha área Fomentu, Comoro, Dili, rezulta joven mane ida kanek-todan no tenke hala’o tratamentu intensivu iha Ospitál Nasionál Guido Valadares (HNGV).

Komandante Polísia Munisípiu Dili, Superintendente Xefe, Armando Monteiro, ohin, informa,  konfrontu ne’e akontese iha segunda kalan, tuku 23:00 Otl, bainhira grupu juventude rua haksesuk to’o hamosu konfrontu fíziku ne’ebé rezulta joven ida kanek maka’as iha nia isin-lolon.

Iha akontesimentu ne’e, autoridade Fomentu nian kontaktu parte Polísia Eskuadra Comoro too hodi halo intervensaun no evakua vítima ba halo tratamentu iha HNGV.

“Ita sei kontinua rekolla informasaun, tanba vítima ne’e too agora ninia família no ninia lokalidade mós ita seidauk hatene, tanba ne’e, ami presiza informasaun hosi komunidade atu bele kontakta família vítima,” informa Armando Monteiro ba jornalista sira iha Komandu Munisípiu Dili.

Armando Monteiro dehan, polisia tenta halo identifikasaun ba kartaun ruma iha vítima, maibé la konsege identifika, tanba ne’e PNTL apela ba família sira iha Dili no munisípiu karik, buka ema ruma bele kontaktu direita ho parte polísia.

Nia dehan, vítima ne’e sofre kanek makas, tanba ne’e too agora vítima sei  presiza halo tratamentu intensivu hodi rekupera nia saúde.

Komandante Armando Monteiro dehan, polísia investigasaun kriminál mós sei kontinua rekolla informasaun hosi autoridade sira hodi buka-tuir suspeitu-sira ne’ebé baku lisuk vítima.

Jornalista : Eugénio Pereira 

Editór       : Francisco Simões

HAKEREK NO HATÁN

Please enter your comment!
Please enter your name here