Uma lubun naksobu tanba indundasaun Sesta (13/03/2020). Imajen/António Gonçalves

DILI, 16 marsu 2020 (TATOLI)–Xefe Suku Bemori, Cristalina Pereira Soares hateten, maioria komunidade Bemori livre hosi inundasaun (lalubur) ne’ebé akontese iha sesta (13/3/2020) lorokraik semana kotuk ne’ebé halo ema barak sai vitima no trauma.

Maibe, nia hatutan, iha uma-kain rua mak afetada ba inundasaun tanba sira-nia uma hela besik iha mota ninin no bee-mota konsege tama no lori sira-nia sasán.

“Suku Bemori komunidade maioria mak livre husi inundasaun.  Maibé, iha aldeia My Friend iha uma kain rua mak afetada tanba sira hela besik loos iha mota ninin. Konserteza, udan boot mota tún sei afeta ba sira-nia uma no sasán lakon hotu,” dehan Xefe Suku Bemori, Cristalina Pereira Soares, ba Ajénsia TATOLI liuhosi nia knaar fatin, Bemori, Dili, segunda (16/3/2020).

Relasiona ho inundasaun, nia dehan, parte autoridade lokál sensibiliza ona informasaun ba ninia komunidade sira katak labele hela besik mota ninin tanba bainhira udan, mota tún sei estraga sira-nia uma no sasán maibé sira la halo tuir.

“Ami halo sensibilizasaun maibé komunidade la halo tuir. Iha komunidade balun kontinua hela iha mota ninin, Entaun sira tenke simu konsekuénsia tanba ne’e natureza ita labele la espera,” nia esplika.

Komunidade sira iha kapitál kuaze hetan inundasaun, nia dehan,  triste tanba iha ema balun mak mak lakon vida no ema barak tebes mak lakon sira-nia sasán uma laran nian.

Nia infroma, vítima inundasaun seidauk hetan apoiu ruma maibé Administradór Postu haruka ona autoridade lokál sira atu rekolla dadus nune’e sira bele hetan ajuda ruma husi Governu liuhosi Ministeriu Siloidaridade Sosiál.

“Ami-nia Administradór mós haruka ona ami, atu foti dadus vítima sira atu nune’e sira bele hetan ajudu husi sosiál,” nia dehan.

Notísia Relevante:  PM Taur Observa Direta Área Afetadu Inundasaun

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here