Primeiru-Ministru, Taur Matan Ruak, prezide Reuniaun Konsellu Ministru estraordinária iha Palásiu Governu, segunda (16/03). Imajen Tatoli/Egas Cristovão

DILI, 17 marsu 2020 (TATOLI) – Governu hakarak informa ba Komunidade sira atu labele pániku relasiona ho planu Governu nian ne’ebé solisita ba Prezidente Repúblika, Francisco Guterres ‘Lú Olo’ atu dekreta Estadu Emerjénsia relasiona ho pandemia Coronavírus ka COVID-19.

“Objetivu hosi Estadu Emerjénsia nian maka atu limita de’it movimentasaun ema-nian, hodi evita sirkulasaun COVID-19, enkuantu importasaun sasán nesesidade báziku sira no medikamentu-nian kontinua la’o hanesan baibain”, haktuir nota ne’ebé Agência Tatoli asesu liuhosi Gabinete Primeiru-Ministru, tersa ne’e.

Governu liuhosi Ministru Kooordenadór Asuntu Ekonómiku interinu, Fidélis Manuel Leite Magalhães, informa segunda ne’e konvoka ona enkontru Jéral ida ho dirijente Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,IP), Sentru Lojístiku Nasionál (CLN, sigla portugés) no Ajénsia importadór sira, oinsá halo preparasaun di’ak atu asegura katak nesesidade báziku kontinua sirkula normál iha merkadu sira no vida ekonomia kontinua la’o nafatin.

Nota ne’e refere liután, iha enkontru ne’e, CLN relata katak estoke nasionál sei seguru hela karik iha kazu nesesáriu tebes atu blokeiu no garante ekonomia rai-laran sei la’o aguenta to’o fulan-haat oin mai.

Entretantu AIFAESA hamutuk ho ajénsia importadór sira sei halo kontrolu ne’ebé rigór ba armazén no loja sira atu nune’e evita importadór ka loja-na’in sira hasa’e folin.

Nune’e, Governu mós husu ba kompradór sira ne’ebé mak ba sosa sasán iha loja-sira, karik haree folin la razoável bele hato’o keixa ba parte kompetente hanesan Polísia inklui AIFAESA atu sira bele tun intervein hodi fó sansaun ba loja-na’in sira.

Nota ne’e haktuir tan, Governu sei la tolera importadór ka loja-na’in sira ne’ebé aproveita oportunidade buka lukru ba an rasik iha situasaun emerjénsia nia-laran.

Jornalista: Antónia Gusmão

Editóra: Julia Chatarina

HAKEREK NO HATÁN

Please enter your comment!
Please enter your name here