Ilustrasaun Ai-han. Imajen/Espesiál

DILI, 17 marsu 2020 (TATOLI)Ministériu Koordenadór Asuntu Ekonómiku (MKAE) konvoka reuniaun ho empreza distributór sira no entidade ne’ebé liga ho asuntu ekonómiku atu asegura ai-han bainhira iha situasaun emerjénsia.

Entidade kompetente sira maka Ministériu Turizmu, Komérsiu no Indistria (MTKI) no Sentru Lojístika Nasionál (CLN, sigla portugés), Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,IP) no seluk tan.

Ministru Koordenadór Asuntu Ekonómia, Fidelis Manuel Leite Magalhães, hateten liuhosi enkontru ohin nian, kuandu mosu situasaun emerjénsia liga ho Coronavírus ka COVID-2019, empreza distributór fós no ai-han sira seluk garante sira sei la manipula folin ai-han.

“Iha enkontru ne’e ajénsia sira mós kompremetidu sei la fa’an sasán ho folin tuir hakarak ka fa’an sasán ho folin aas”, tenik Ministru Fidelis liuhosi konferénsia imprensa hafoin enkontru ho entidade kompetente sira iha área ekonómiku iha Sentru Konvensaun Dili (CCD,sigla portugés), tersa ne’e.

Biban ne’e, governante ne’e husu sidadaun sira labele tauk tanba Governu sei tenta jere didi’ak hodi bele hatán nesesidade báziku sira.

“Husu ba ita-nian sidadaun sira labele pániku no labele haree ba ita-nia aan de’it maibé tenke iha nosaun katak sé ita atu utrapasa situasaun COVID-19 presiza iha solidariadade ba malu”, akresenta Fidelis.

Ho nune’e, maka atuál Ministru Reforma Lejizlativa no Asuntu Parlamentár orienta parte AIFAESA atu halo kotrolu ba loja sira nune’e labele hasa’e folin sasán bainhira Timor-Leste enfrenta situasaun emerjénsia.

“Ohin ha’u mós husu ba parte AIFAESA atu aumenta no intesifikasaun kontrolu ba ita-nian merkadu no armajen sira atu evita folin penkulativu ka loja sira ne’ebé hasa’e folin. Tanba AIFAESA rasik iha knaar importante atu kontrola no sira kompromete ohin sei tun hodi haree iha fatin fa’an sasán, nune’e prátika hasa’e folin tuir hakarak labele akontese”, nia akresenta.

Iha Fatin hanesan, Na’in ba Empreza Perisos, James, garante folin fós sei normál no laiha problema.

“Ami-nian folin fós kontinua normál ne’ebé kuandu situasaun emerjénsia ami bele respode hodi tulun ita-ni povu”, nia salienta.

Nune’e mós Kordenadór Jerál AIFAESA, Abílio Oliveira Sereno, afirma nu’udar institusaun Governu ne’ebé haree ba kontrolu ai-han nian, autoridade ne’e promete sei halo kontrolu másimu ba ai-han sira.

“Ami sei kumpre orientasaun ne’ebé ohin Ministru fó no sei masimiza kotrolu ba loja sira hodi haree folin nesesidade sira”, nia dehan tan.

Koordenadór ne’e refere liután, iha situasaun emerjénsia sira-ne’e empreza sira fa’an sasán ho folin aas ne’e signifika krime.

“Ami hamutuk ho Polísia Investigasaun Kriminál Nasionál foin daudaun ne’e halo tama ba Farmásia Moris Foun, Colmera ne’ebé fa’an máskara ho folin karun no ami halo apreensaun  no haloot kedan sasán sira, no ikus liu halo kedan prosesu ba na’in ba farmásia  tanba ida-ne’e kategoria krime”, Abílio subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here