Prizioneiru-sira iha Prizaun Becora, iha loron 01 Setembru 2019, transfere ba Prizaun Suai. Imajen/Antonio Goncalves

DILI, 17 marsu 2020 (TATOLI) – Tribunal Distritál Dili (TDD), ohin, hala’o julgamentu ba arguidu NMDS nu’udar funsionáriu públiku no ajente estadu ida ne’ebé deskonfia komete kazu krime abuzu konfiansa agravadu.

Tuir depoimentu hosi Prokuradór Osório de Deus ne’ebé reprezenta Ministériu Públiku, katak, iha loron 23 abríl 2013, lezadu AM nu’udar dadur muda hosi Prizaun Becora ba Prizaun Gleno no to’o iha ne’ebá lezadu tenke submete ba regulamentu prizaun nian katak dadur sira nia sasán tenke entrega hotu ba iha autoridade Guarda Prizionál.

Momentu ne’e kedas, lezadu AM nu’udar dadur  entrega hotu ninia sasán sira hanesan, sinturaun (1) ho folin $300.00, ne’ebé sosa iha mall Tanah Abang, Jakarta-Indonézia iha tinan 2010, telefone iPad (1) ho folin $700 (sosa iha timor), livriñu hamutuk tolu (la apura nia folin) ho dokumentu akordu dame entre família vítima ho lezadu (kona-ba kazu ne’ebé lezadu sai kondenadu).

Kumpre tiha medida detensaun iha Prizaun Gleno durante fulan lima, maka iha loron 26 agostu 2013,  muda fali lezadu  mai Prizaun  Becora.

Iha loron 22 setembru 2014, lezadu hatama reklamasaun ba  arguidu nu’udar ajente importante iha Prizaun Gleno atu entrega fali lezadu nia sasán. Maibé arguidu devolve de’it fali  lezadu nia  osan $240.00 no sasán sira seluk la entrega, tanba ne’e, lezadu mós reklama beibeik atu arguidu bele fó fila lalaís.

To’o lezadu hetan liberdade kondisionál mós arguidu la entrega lezadu nia sasán. Nune’e, hamosu prejuizu ba lezadu tantu haree hosi sasán nia folin no dokumentu importante ne’ebé rai iha telemovél iPad nia laran (foto família).

Ba kazu ne’e, Ministériu Públiku akuza arguidu nu’udar autór materiál ho forma konsumada ba krime abuzu konfiansa agravadu ne’ebé previstu iha artigu 257 númeru 1,2 iha kódigu penál Timor-Leste.

Arguidu NDDS iha ninia deklarasaun ba tribunal katak, faktu sira ne’e balun loos no balun sala, tanba momentu ne’ebá iha tinan 2013 nia sei hala’o hela kna’ar iha Ministériu Justisa iha Dili, nu’udar xefe departamentu ida.

Nia hateten, iha loron 13 setembru 2013 hetan fiar asume fali kna’ar nu’udar diretór hodi substitui diretór sesante to’o agora. Tanba ne’e, arguidu deklara katak, momentu ne’ebá lezada husu duni nia osan ho nune’e arguidu fó orden ba iha diresaun rekursu umanu hodi entrega hikas lezadu nia osan $200.00.

Kona-ba transferénsia bens sasán lezada nian , arguidu lia-tun dehan, nia parte la hatene, maibé tuir regra interna kuandu sasán rekluzu sira nian tama iha prizaun liu ona tinan rua tenke halo destruisaun.

Lezadu triste nia sasán sira ne’e seidauk entrega fali ba nia, mezmu nune’e, nia rekoñese kona-ba osan iha momentu ne’ebá iha Prizaun Gleno nia husu arguidu fó orientasaun ba iha diresaun rekursu umanu hodi entrega hikas ba nia, tanba momentu ne’ebá afeta moras balun hodi sosa susu-been hemu.

Hosi sorin seluk, sasin CS  nu’udar diretór sesante deklara ba tribunal katak,  nia parte la-iha koñesimentu ba sasán lezadu nian bainhira lezadu halo transferénsia ba iha Prizaun Gleno.

Atu hetan verdade ba faktu sira tuir depoimentu MP nian, maka tribunal sei solisita ba Prizaun Gleno ho Becora durante prazu loron 10 hodi fornese kona-ba lista dokumentu rekluzu nian ba sasán bens-sira lezadu nian hodi komprova liu-tan faktu sira.

Ho nune’e, Juiz koletivu Antonio do Carmo, Albertina Neves, Sribuana da Costa. deside adia fila-fali julgamentu ne’e ba iha loron 13 abríl 2020 tuku 11:00 Otl. Iha audiénsia julgamentu ne’e, arguido hetan asisténsia legál hosi Defensór Públiku Germano Guterres Ramos.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here