iklan

NASIONÁL, EKONOMIA, HEADLINE

CLN Garante Stock Ai-han Nasionál Sei Sufisiente

CLN Garante Stock Ai-han Nasionál Sei Sufisiente

Ministru Koordenadór Asuntu Ekonómiku interinu, Fidelis Manuel Leite Magalhães hala’o konferénsia imprensa hafoin konvoka enkontru ho entidade relevante sira kona-ba stock ai-han nasionál. Imajen/Mídia-MKAE

DILI, 17 marsu 2020 (TATOLI) – Ministru Koordenadór Asuntu Ekonómiku interinu, Fidelis Manuel Leite Magalhães, konvoka reuniaun urjente ho entidade sira ne’ebé durante ne’e oferese ai-han ba komunidade rai-laran, tantu públiku no privadu, tanba foin lalais ne’e Governu solisita Prezidente Repúblika, Francisco Guterres ‘Lu Olo’ atu dekreta Estadu Emerjénsia relasiona ho pandemia Coronavírus ka COVID-19.

Ba kestaun ne’e, Ministru Fidelis hateten, bainhira Xefe Estadu foti ona desizaun ruma hodi deklara Estadu Emerjénsia, husu ba populasaun labele pániku tanba Sentru Lojístika Nasionál (CLN-sigla portugés) no distributór seluk garante stock ai-han nasionál sei sufisiente atu sustenta rai-laran.

 “Ohin ha’u enkotru ho  Diretór Ezekutivu CLN no halo konvokatóriu ujente ba ita-nian setór privadu sira, liuliu ba distributór ai-han sira hanesan fós no ai-han seluk iha rai-laran. Konluzaun husi enkontru ne’e ami identifika pontu hirak hanesan ita-nia stock alimentasaun sei sufisiente, tanba ne’e konsumidór sira labele pániku”, nia informa liuhosi konferénsia imprensa iha Sentru Konvensaun Dili (CCD,sigla portugés), tersa ne’e.

Atuál Ministru Reforma Lejizlativa no Asuntu Parlamentár refere liután, bainhira kazu emerjénsia prolonga karik maka setór privadu sira iha ligasaun rejionál ho fonte ba ai-han sira husi fatin seluk atubele hatama ai-han hodi hatan ba nesesidade doméstiku.

“Ida-ne’e nu’udar pontu prinsipál, nune’e ita-nian públiku bele hela ho kalma“, Ministru akresenta.

Tuir governante ne’e, atu asegura ai-han, Ministériu Turizmu, Komérsiu no Industria aprova ona akizisaun ba importasaun fós tonelada 3800 husi rai-li’ur.

“Ita aprova ona orsamentu ba  kestaun hirak ne’e no sei servisu hamutuk ho ita setór privadu nasionál atu garante katak ita iha stock ne’ebé maka sufisienta atu abastese ita-nian sidadaun sira”, nia salienta.

Iha fatin hanesan  Prezidente CLN, Agosto Junior Trindade, konfirma katak sentru ne’e rezerva ona stock ne’ebé maka sufiente atu hatan ba situasaun emerjénsia.

“Ita hanesan Estadu nafatin garantia katak laiha problema ba stock nasionál . Stock nasionál ne’ebé iha ita-nia armazen rasik iha fós por volta tonelada 700 no ita mós iha haré kulit ne’ebé dulas ona hamutuk tonela 1.200. Maibé ita rasik ko’alia ona ho kompañia importadór sira atu servisu hamutuk hodi asegura”, nia subliña.

Jornalista: Natalino Costa

Editora: Julia Chatarina

iklan
iklan

Leave a Reply

iklan
error: Content is protected !!