Diretór Operasaun AIFAESA.IP, Gabriel da Costa. Imajen Tatoli/Egas Cristovão

DILI, 17 marsu 2020 (TATOLI) – Autoridade Inspesaun Fiskalizasaun Atividade Ekonómika Sanitária, Institutu Públiku (AIFAESA,IP) hamutuk ho Polisia Nasionál Servisu Investigasaun Kriminál (PNSIK), hahú halo inspesaun ba loja iha Dili laran atu kontrola folin ai-han.

Iniasiativa ne’e hafoin ajénsia importadór sira hamutuk ho entidade sira ne’ebé iha ligasaun ho atividade ekonomia rai-laran halo enkontru ho Ministru Koordenadór Asuntu Ekonómiku, Fidelis Manuel Leite Magalhães, hodi ko’alia kona-ba folin hahan iha rai-laran bainhira iha situasaun krize liga COVID-19.

Diretór Operasaun AIFAESA, Gabriel da Costa,  informa tuir orientasaun husi Governu parte autoridade tenke kontrolu folin ai-han iha merkadu hodi negosiante sira labele manipula folin sasán.

“AIFAESA hetan ona orientasaun husi Ministru Fidelis hodi husu AIFAESA halo kontrolu másimu ba folin sasán iha loja no supermerkadu hosi labele manipula folin. Husi inspesaun ne’e ami seidauk hetan loja no supermerdu ruma maka fa’an fós no sasán seluk ho presu a’as. Sasán hotu agora ho folin normál”, dehan Gabiel ba Agência Tatoli hafoin ramata inspesaun ba Loja Delina iha Fatuhada, tersa ne’e.

Nia adianta, razaun parte AIFAESA tenke kolabora ho PNSIK tanba kona-ba sasán sira ne’ebé  hanesan fós no nesesidade seluk, bainhira hasa’e folin ne’e kategoria krime no ida-ne’e hanesan kompoténsia Polísia nian atu haree.

Tuir Gabriel katak AIFAESA sei hahú la’o ba loja sira ne’e bainhira simu informasaun husi komunidade katak loja balun iha Dili hahú hasa’e folin, hanesan ezemplu iha Loja Deliana iha Fatuhada, Lisun iha Hudi Laran, Loja Happy 2 iha Bairro Pité  no Supermerkadu Huelsia iha Bairró Pité inklui mós kios kiik sira seluk.

“Husi ami-nian inspesaun ne’ebé halo ona iha estabelesimentu hirak ne’e hamutuk ho PNSIK rasik, ami seidauk hetan kios, loja no supermerkadu iha Dili laran ne’ebé hasa’e folin fós no sasán seluk”, nia akresenta.

Nia alerta, bainhira iha inspesaun ne’e mak parte rua ne’e hetan operadór ekonómiku sira hasa’e folin hahan tuir hakarak maka sei foti medida rigorozu.

Maski nune’e, Gabiel relata katak baseia ba rezultadu inspesaun AIFAESA no PNSIK atividade negosiante sira kontinua la’o normál.

“Rezultadu husi ami-nian inspesaun iha loja no supermerkadu sira, laiha ida maka hasa’e folin fós nian no no sasán seluk. Folin fós Folson kilu 30 ho folin $15 dolar ne’e presu normál,  Kuda Ulun kilu 30 ho folin $12,50, fós wangi kilu 15 $12,50, Globus kilu 25 $12,50, no fós Lafaek kilu 25 $11,50 no fós Beruan Merah nia presu normál kilu 25 $12,50”, nia esplika.

Nune’e, Dirijente ne’e husu ba loja no supermerkadu sira tenke mantein folin normál hodi bele kooresponde ba nesesidade populasaun nian ba situasaun emerjénsia sira.

Enkuantu iha kuarta (18/3) AIFAESA  kontinua hamutuk ho PNSIK halo inspesaun ba loja no supermerkadu ne’ebé fa’an fós no sasán sira seluk, nune’e bele halo kontrolu ba folin sasán ha Dili laran hodi negosiante sira labele manipula presu tuir sira nia hakarak.

                                                                                                             Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here