Imajen Tatoli/Cipriano Colo

DILI 17 marsu 2020 (TATOLI)–Xefe Suku Uabubu, Joanico Maria Alves da Crus hateten, iha fulan Abríl tinan ne’e,  Prezidente Repúblika (PR), Francisco Guterres “Lú Olo” sei lansa programa kampaña nasionál “Sidadaun Ida, Ai-hun Ida” iha Suku Uabubu, Postu Administrativu Ossu, Munisípiu Víqueque.

“Prezidente Repúblika prontu atu ba maibé data ne’e ami mak sei deside. Tuir planu sei realiza iha fulan Abril tinan ne’e. Iha kedan suku Uabubu,” dehan Xefe Suku Uabubu, Joanico Maria Alves da Crus, ba jornalista sira hafoin soru mutu ho Xefe Estadu “Lú Olo”, iha Palásiu Prezidensiál Bairru-Pité, Dili, ohin.

Xefe Suku hamutuk ho parseiru sira, mai konvida Xefe Estadu hodi lansa kuda ai-oan iha Suku Uabubu tanba haree katak fatin istóriku iha suku ne’e, oras ne’e, la iha ai-hun ruma atu satan netik.

“Ami nia objetivu mai hasoru Prezidente Repúblika, atu ko’alia kona-ba, programa ne’ebé mak iha kedan gabinete Prezidente Repúblika rasik katak, sidadaun ida kuda aioan ida. Tanba ne’e ami mós hakarak hatutan de’it programa ida ne’e, ami rasik mak iha inisiativa hodi halo preparasaun. Nune’e ami hakarak atu konvida Xefe Estadu ba iha ami-nia fatin, hodi halo mós lansamentu kuda ai-oan iha ami nia fatin,” Xefe Suku ne’e esplika.

Kona-ba ai-oan ne’ebé sei kuda, Xefe Suku ne’e iha ona kalkulasaun katak, parseiru Sira prepara ona ai-oan hamutuk 1.010.

“Ami husu apoiu husi parseiru Sira hanesan Ministériu Agrikultura no Peska (MAP) no seluk tan,” nia informa.

Ai ne’ebé oras ne’e iha ona mak hanesan, mahoni, Saria, Akasia, Rambutan, Kuluzaka, Salak, no Aikalmeli.

“Ami mós sei konvida governu liu husi Sekretaria Estadu Ambiente (SEA) atu bele partisipa iha lansamentu ne’e”, xefe Suku ne’e mensiona.

Entretantu, xefe Suku ne’e, akompañadu husi Dirtór MAP munisípiu Víqueque, reprezentante parseiru Organizasaun Naun Governamentál Agra, no reprezentante veteranu sira.

Suku Uabubu ninia aldeia sira mak hanesan, aldeia sibori, aldeia Lekibuti, aldeia Laritame, aldeia Wailia, aldeia Bua Nurak no aldeia Dauburbaha.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here