DILI, 16 marsu 2020 (TATOLI)-Governu Timor-Leste liuhosi Ministériu Negósiu Estranjeiru no Kooperasaun (MNEK) to’o segunda (16/03/2020), seidauk simu informasaun formal hosi Estadu Indonézia ko-naba planu atu taka provizóriu movimentu ema iha fronteira terrestre Motain, Munisípiu Bobonaro no fatin seluk tan hodi prevene surtu coronavirus.
Ministru Deonísio Soares Babo husu ba populasaun Timor-Leste atu labele paníku ho informasaun ne’ebé maka espalla iha públiku tanba Governu rai rua seidauk foti desizaun ruma ko-naba asuntu ne’e.
Notísia Relevante :Indonézia Rejeita Taka Fronteira Terrestre
Maibé Dionísio informa Governu Konstitusionál da-ualu mós iha ona planu atu koordena ho Autoridade Provínsia Nusa Tenggara Timur (NTT), oinsá atu servisu hamutuk hodi prevene COVID-19 iha fronteira terrestre iha futuru.
“Informasaun fó sai ona hosi mídia sira, maibé formalmente ita seidauk hetan notifikasaun ida, ha’u hanoin hanesan medida ida interna sira ne’e konforme sira atu halo. Ita mós halo ona iha Konsellu Ministru sei lori ba iha Prezidente Repúblika atu husu estraordinária para oinsá bele kontrola ko-naba surtu coronavirus ne’e rasik, ne’ebé populasaun sira labele paníku ho situasaun ne’e,”katak Ministru Babo, ba jornalista sira iha Palasiu Governu Dili, segunda (16/03/2020).
Entretantu, Governu Indonézia liuhosi ninia reprezentasaun iha KBRI Dili, segunda ohin, informa Indonézia seidauk hasai desizaun ruma atu taka provizóriu fronteira Terrestre hodi prevene coronavirus.
Jornalista : Hortencio Sanchez
Editór : Agapito dos Santos
