Komunidade iha Becuse nia uma hetan estragu hafoin udan boot ne’ebé akontese iha 13 marsu no halo Ponte Becuse intupidu no halo mota sobu komunidade sira ninia uma. Imajen Tatoli/António Gonçalves

DILI, 16 marsu 2020 (TATOLI) – Governu liuhosi Sekretaria Estadu Protesaun Sivíl (SEPS) rejista família vítima ba dezastre naturál hafoin udan iha sesta lorokraik (13/03), hodi hamosu inundasaun iha kapitál Dili hamutuk 1.105.

“Família vítima ba dezastre naturál ne’e ita rejista hamutuk ona 1.105, maibé afetadu ba pesoál ne’e kuaze 6.000-resin no husi dadus ne’ebé mak iha ita kontinua fó apoiu emerjénsia hanesan ai-han no mós la’ós ai-han ba família kuaze 100-resin ona,” tenik Sekrétariu Estadu Protesaun Sivíl, Alexandrinho Xavier Araújo iha Palásiu Governu, segunda ne’e.

Governante ne’e dehan, daudaun ne’e SEPS hamutuk ho ekipa ministeriál fó apoiu emerjénsia ba família vítima sira ho baze ba dadus.

“Ita fó ona apoiu emerjénsia balun ba família vítima sira, maibé seidauk hotu. Ita sei kontinua fó apoiu hanesan horisehik ba vítima sira iha  Santa Cruz, mas seidauk hotu. Hera nian mak hotu ona no falta ida rua, enkuantu Bidau nia mós ita fó ona maibé seidauk hotu, no fatin balun hanesan Becusse, Ponte My Friend no Becora maka seidauk”, nia akresenta.

Governante ne’e adianta, SEPS no ekipa liña ministeriál kontinua foti dadus ba afetadu balun ne’ebé seidauk rejistu atu fó apoiu emerjésia.

SEPS fó apoia emerjénsia ba ai-han hanesan foos, mina no sumpremie no la’ós ai-han hanesan lona, bikan, sanak, kanuru, rinso no sabaun, inklui nesesidade seluk tan.

Aleinde ne’e, nia salienta komunidade afetadu sira ne’ebé nia-uma rahun, sei fó apoia re-kooperasaun ka re-konstrusaun hafoin finaliza levatamentu dadus.

“Ba vítima ne’ebé ninia sasan ka uma afetadu, hafoin apoiu emerjénsia hotu sei halo levatamentu dadus maka sei apoiu hodi haree uma balun ne’ebé bee ka mota sobu to’o sai aat totál, kama’an no ladún aat, nia informa.

Sekrétariu Estadu ne’e subliña, enkontru Konsellu Ministru ohin deside ona atu prevee osan hodi fó apoia ba vítima ne’ebé nia-uma hetan sobu.

“Tempu badak ita sei halo proposta ba  Primeiru-Ministru atu prevee orsamentu ruma liuhosi desizaun Konsellu Ministru, nune’e bele hadi’a komunidade afetadu sira nia uma iha futuru tanba Estadu tomak preokupa”, nia afirma.

Tuir nia, apoiu emerjénsi hanesan ai-han no la’ós ai-han ne’e iha hela atu fó ba familia vítima sira tanba hetan apoiu husi liña ministeriál no ajénsia internsionál sira.

Hafoin udan boot ne’ebé akontese kuaze oras rua iha Kapitál Dili sesta ne’e, hamosu inundasaun forte kuaze iha kapitál laran iha parte Sentru no Leste nian no área sira ne’ebé afetadu maka’as maka hanesan Becora, Becusse, Bidau, Bemori, Caicoli, Maloa no Prezidénsia Repúblika.

Antes ne’e, Primeiru Ministru, Taur Matan Ruak hato’o ona sentidu kondolénsia ba família ne’ebé lakon ninia familília no solidaridade ba komunidade afetadu sira.

Haree ba situasaun ne’e, Xefe Governu orienta ona Ministru Obra Públika, Salvador Eugênio Soares dos Reis Pires no Sekretáriu Estadu Protesaun Sivíl, Alexandrino de Araújo, hodi observa direta ba terenu hodi halo evakuasaun emerjénsia ba vítima sira ne’ebé afetadu maka’as ba inundasaun.

Hosi dezastre naturál ne’e, mota lori ema na’in- 4, na’in ida mak mate, no na’in-3 konsege salva lori halai ba Hospital Nacional Guido no Valadares (HNGV).

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here