Sekretáriu Estadu Ambiente, Demétrio do Amaral de Carvalho, Imajen Tatoli/Egas Cristovão

DILI, 16 marsu 2020 (TATOLI) – Empreza Caltech iha ona planu atu halo resiklajen lixu plástiku ba materiál konstrusaun, atu rezolve lixu ho kuantidade boot ne’ebé espalla iha Kapitál Dili.

Ba inisiativa ida ne’e, Sekretáriu Estadu Ambiente , Demétrio do Amaral de Carvalho, informa Governu liuhosi Sekretaria Estadu Ambiente (SEA) sei estabelese sentru rekollamentu plástiku iha suku sira iha Kapitál Dili atu ajuda empreza Caltech rekolla lixu.

 “Ita presiza mekanizmu  estabelese sentru rekolla plástiku iha suku sira, hodi tulun kompañia.  Sé ita hotu hatene katak plástiku ne’e sai problema ba ita-nia an no  ambiente, la’ós buat todan ida atu ita halibur plástiku iha ita-nia uma oin, bairru ka iha fatin neébé de’it  hodi kompañia Caltech ba rekolla hodi prodús buat foun”, tenik Sekretáriu Estadu Demétrio ba Agência Tatoli iha ninia knaar fatin, Bebora, segunda ne’e.

Nia adianta,  estabelesimentu sentru rekolla plástiku ne’e,  SEA halo ligasaun ho empreza  hodi rekolla no transporta ba resiklajen atu sai materiál konstrusaun.

“Ita sei halo komunikasaun ho konsellu suku sira hodi estabelese sentru prosesamentu rekolla lixu no ita sei hahú iha suku ne’ebé risku liu hafoin ita alarga”, nia akresenta.

Tuir governante ne’e, mákina ne’ebé empreza Caltech iha la’ós mákina boot hodi bele transforma tonelada 150 kada loron, maibé sira iha kapasidade halo produsaun ho mákina ho kuantidade tonelada 4 to’o 5 kada loron.

Empreza Caltech ne’ebé ho esforsu rasik halo tratamentu ba lixu ka resiklajen, inklui kaixa mamuk, botir, ákua no mós sunu sasán ospitalár atubele mellora ambiente iha país ne’e.

Polítika zero plástiku ne’e define hanesan prioridade Governu tanba Timor-Leste nia kuantidade lixu plástiku ne’ebé prodús porsentu 18 to’o 20.

Bazeia ba Lei Baze Ambientál númeru 26/2012, lei numeru 2/2017, kona-ba Sistema Jestaun Rezíduu Sólidu Urbanu no Dekretu-Lei 32/2016 kona-ba Estratéjia hodi Melloramentu Jestaun Lixu Urbana, sira hasai mós sirkulár ida ba empreza sira atu fó avizu ba kompradór atu hahú utiliza ona pasta amigável ho ambiente.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here