Primeiru Ministru, Taur Matan Ruak akompaña ho Ministru Obra Públiku, Salvadór Eugénio Soares dos Reis Pires, observa ekipamentu suru sai sedimentasaun iha mota sira. imajen Tatoli/Florencio Miranda Ximenes

DILI, 16 marsu 2020 (TATOLI) – Hafoin observa direita ba kondisaun família vítima sira no sedimentasaun iha mota, hafoin inundasaun iha kapitál Dili iha sesta lorokraik (13/03), Primeiru-Ministru (PM), Taur Matan Ruak fó orientasaun ona ba Ministériu Administrasaun Estatal (MAE) hodi apela ba autoridade lokál sira atu organiza komunidade apoia solidaridade ba família vítima sira.

“Iha situasaun hanesan ne’e ita tenke ajuda malu hahú husi komunidade iha aldeia laran, suku, postu administrativu no munisípiu to’o Governu Sentrál. Ita apela ba komunidade, autoridade lokál sira hodi organiza malu fó apoia solidaridade ka ajuda malu labele hein de’it Governu,” tenik PM Taur hafoin observa direita família vítima no kondisaun ponte sira iha ponte Maufelu, Becora, segunda ne’e.

Xefe Governu mós lamenta loos tanba bee estraga komunidade sira nia sasán hanesan uma no propriedade barak, tanba ne’e maka nia hakarak manifesta solidaridade ba populasaun sira tomak no hato’o sentidu kondolénsia ba familia ne’ebé lakon vida.

“Bainhira ita haree hanesan ne’e ka situasaun emerjente, entaun ita presiza apoia malu hodi servisu ne’e bele sai kama’an no lais, maibé ita hanoin hein de’it Primeiru Ministru tun, Maun Xanana tun no Ministru Obra Públiku tun, entaun sei todan”, nia akresenta.

Eis Prezidente Repúblika halo observasaun direita akompaña ho Ministru Obra Públika, Salvadór Eugénio Soares dos Reis Pires.

Nia informa tan, ekipamentu pezadu hahú suru sedimentasaun iha mota sira atu regulariza mota iha tempu udan.

“Ami haree buka dalan halo nusa para hamosu projetu emerjénsia ruma atu kompañia privadu sira reforsa Institutu Jestaun Ekipamentu (IGE, sigla portugés) atubele regulariza lalais mota sira”, Xefe Governu adianta.

Nune’e, PM Taur fó oreintasaun ona ba Ministériu Obra Públika (MOP) no Sekretaria Estadu Protesaun Sivíl (SEPS) hamutuk ho liña ministeriál sira hodi kontinua fó apoia emerjensia fíziku no la’ós fíziku hodi normaliza kondisaun iha  Kapitál Dili.

Konsellu Ministru mós deskute ona ba futuru sei fó apoia re-kooperasaun ba abitante afetadu nia sasán no uma.

“ Ohin, Governu deside fó toleránsia pontu ba loron-rua hahú aban no bainrua atu balun bele ajuda komunidade sira no balun bele haree sira ninia fatin sira ne’ebé hetan afetadu hodi  halo limpeja jerál iha kapitál Dili”, nia informa.

Governu liuhosi SEPS rejista família Vítima ba dezastre naturál hafoin udan hodi hamosu inundasaun iha Kapitál Dili hamutuk 1.105 no afetadu ba pesoál kuaze 6.000-resin ne’ebé hetan ona apoia emerjénsia kuaze 100-resin.

SEPS fó apoia emerjénsia hanesan ai-han hanesan foos, mina no supermie no la’ós ai-han hanesan lona, bikan, sanak, kanuru, rinso no sabaun inklui nesesidade seluk tan.

Aleinde ne’e, nia afirma tan komunidade afetadu sira ne’ebé nia uma rahun sei fó apoia re-kooperasaun ka re-konstrusaun hafoin finaliza levatamentu dadus.

Hafoin udan boot ne’ebé akontese kuaze oras rua nia laran iha Kapitál Dili sesta ne’e, hamosu inundasaun iha kapitál laran iha parte Sentru no Leste nian, liuliu área sira ne’ebé afetadu maka’as mak hanesan Becora, Becusse, Bidau, Bemori, Caicoli, Maloa no Prezidénsia Repúblika.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here