Komunidade afetadu husi mota Maufelu intupidu hodi sobu komunidade nia uma

DILI, 16 marsu 2020 (TATOLI)–Vítima afetada ba lalubur iha Becora-Au-Hun, Nicolau da Silva hateten, dokumentu no diploma universidade nian ne’ebé durante tinan barak nia esforsu no luta hetan ne’e, bee-mota lori mohu nune’e leet de’it.

Nia hatutan, sasán hotu mak lakon ne’e la iha buat tanba sasán sira ne’e bele buka hetan fali. Maibé, dokumentu ka diploma mak lakon ne’e sente lakon ita-nia vida tomak. Tanba ne’e, nia husu ba Ministériu Edukasaun Juventude no Desportu (SEJD) atu ajuda oinsá sira bele hetan dokumentu.

“Pior liu mak ha’u-nia dokumentu no diploma universidade nian ne’ebé durante ha’u esforsu no luta tinan ba tinan mak ha’u foin hetan, maibé ohin loron diploma sai taho no lakon tiha de’it nune’e. Ha’u husu ba Ministériu Edukasaun Juventude no Desportu (SEJD) atu ajuda oinsá sira bele hetan dokumentu. Dokumentu mak ha’u-nia moris. Tanba laiha nia, ha’u sente lakon buat hotu iha ha’u-nia moris,” dehan Nicolau da Silva ba Ajénsia TATOLI iha Becora, segunda (16/3/2020).

Daudaun ne’e, tanba lakon hotu nia uma, Nicolau da Silva hamutuk ho nia feen no oan sira hela provizóriu iha kolega ida-nia uma tanba uma no sasan mota sobu no lori hotu ba tasi laran.

“Agora daudaun ami hela provizóriu iha kolega nia uma tanba uma no sasan mota sobu no lori hotu. Ami hiit liman de’it tanba la iha buat ida mak hodi garantia ba moris loron-loron nian,” Nicolau haktuir ba ajénsia TATOLI, ohin,ho laran dodok no oin triste.

Vitíma inundasaun, Niacolau da Silva hateten, nia sente triste tanba dezastre naturál ne’e halo nia moris fali hahú hosi zero. Tanba, nia dehan, uma no sasán sira ne’ebé nia hetan tinan kleur inklui diploma mós lakon mohu.

“Ha’u triste tebes. Tanba, ha’u-nia oan mesak kiik-oan entaun bainhira mak ami bele liu susar boot ida ne’e, iha ha’u-nia moris. Moris ida ne’e tenke hahú husi zero,” nia ko’alia ho matan-been.

Notísia Relevante: “Governu La Konsidera Ami Nu’udar Nia Povu”

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here