Imajen Tatoli/Nelia Fernandes

DILI, 15 marsu 2020 (TATOLI)—Matebian Alegria Bento ne’ebé mota lori no mate iha Mota Taibesi iha dezastre naturál ne’ebé akontese iha sesta horisehik, ohin, haloot ona iha Semitériu Becuse, Suku Becora, Postu Administrativu Cristo Rei, Munisípiu Dili.

Xefe Aldeia Berbido, Martins da Costa, hanesan mós família hosi matebian Alegria da Costa hateten, nuudar aman ida, nia lakon ona oan ida maibé nia ho família tomak la hatudu liman ba ema ida tanba ne’e dezastre naturál nia hahalok.

Nia haktuir, matebian Alegria Bento ne’ebé baibain ema bolu Aleky ne’ebé hela iha Berbido ne’e nu’udar oan dahitu (7) hosi maun-alin hamutuk ema na’in ualu ne’ebé kompostu hosi mane ema na’in haat (4) no feto na’in haat (4).

Antes haloot mate-isin, Xefe Aldeia ne’e haktuir, família matebian realiza misa requiem iha Kapela Rate Becuse niinian, ne’ebé akompaña hosi viziñu, parente sira, no matebian nia kolega sira lubun ida.

To’o matebian haloot iha fatin hakmatek ikus nian, nia hatutan, nia parte hato’o ona informasaun ne’e ba Xefe Suku Becora, Administradór Cristo Rei, no ba Ministériu Solidaridade Sosiál (MSS).

“Hanesan ita-nia na’i ulun sira seidauk tama iha ne’e. Maibé kona-ba polísia seguransa, Komandante Polísia Eskuadra Nain Feto nian mak mai iha ne’e hola dadus. Governu liuhosi Ministériu Solidaridade Sosiál (MSS) mak fó ona apoiu hanesan foos, supermie, no lona,” dehan Xefe Aldeia Berbidu, Martins da Costa, ba Ajénsia TATOLI iha Berbido, Becuse, Becora, Dili, domingu (15/3/2020).

Xefe Aldeia Martins da Costa hatutan, ho akontesimentu ne’e, lia-na’in sira hosi Suku Becora mak mai vizita tanba lia-na’in sira preokupa hela ba dezastre naturál ne’ebé foin akontese iha fatin refere.

“Xefe suku mós ho kondisaun moras no Administrador mós okupadu tanba dalaruma nia hela fatin (Kulau) mós afetadu ba dezastre ne’e. No, dalaruma nia tenke hamatan ba nia populasaun sira iha Becora Mota Ulun ne’eba,” nia dehan.

Ba akontesimentu dezastre naturál ne’e, nia dehan, ita ema tenke kuñese no respeita ba natureza hodi labele tesi ai arbiru no sunu rai arbiru.

“Ita-nia ambiente, ita-nia maluk balun tesi ai la hatene tuir. Balun sunu rai ho taka matan. Ita seidauk hatene tuir akontesimentu nee seidauk eziste. Foin primeira akontese. Ida ne’e loke ema hotu nia laran no hanoin para evita no iha konsiensia respeita no hadomi ita-nia natureza. Atu nune’e, ba família sira seluk, labele lakon tan familia ida hanesan ha’u lakon ha’u-nia oan ne’ebé mak oan mane di’ak ida,” nia hato’o ho laran susar.

Notísia Relevante: Hakarak Salva Tia Ida ho Nia Oan, Alegria Bento Mota Lori no Mate

Jornalista : Nelia Fernandes

Editóra     : Cancio Ximenes

HAKEREK NO HATÁN

Please enter your comment!
Please enter your name here