Kondisaun komunidade sira ninia uma, ne’ebé hela besik mota-ninin Bidau hetan estragu hafoin udan-boot no provoka inundasaun sesta lorokraik (13/03). Imajen Tatoli/António Gonçalves

DILI, 16 marsu 2020 (TATOLI) – Ezekutivu sira liuhosi sorumutu Konsellu Ministru (KM) estraordinária, halo analiza ba estragu sira ne’ebé provoka husi udan-boot iha sesta lorokraik (13/03) hodi rezulta inundasaun iha parte sentru no leste Kapitál Dili.

“Inundasaun maka’as no forte provoka mós estragu ne’ebé boot tebes ba sasán no materiál sira iha sidade Dili nia laran no ema barak ne’ebé mak lakon uma, barak maka hetan kanek no balun lakon sira-nia vida”, tenik Ministru Reforma Lejizlativa no Asuntu Parlamentár, Fidelis Manuel Leite Magalhães, hafoin reuniaun KM estraordinária iha Palásiu Governu, segunda ne’e.

Ezekutiva sira mós halo analiza ba medida nesesária sira iha faze rekuperasaun ba estragu sira husi mota-boot.

Alende ne’e, analiza medida konjuntu ida ba tempu badak no ba tempu naruk atu minimiza efeitu husi udan-boot.

“Kona-ba rekuperasaun no normalizasaun ba vítima inundasaun, ministériu relevante sira prepara pakote ne’ebé solisita ona ba Ministériu Finansa no bainhira pakote hirak ne’e prontu atu bele fasilita rekuperasaun, maka Ministériu Finansa sei haree hodi aprova”, nia esplika.

Governante ne’e informa liután, iha diskusaun ezekutivu sira halo analiza kle’an ba situasaun no haree servisu ne’ebé ministériu kompetente halo no atuasaun ne’ebé maka Ministériu Interior liuhosi Sekretaria Estadu ba Protesaun sivíl (SEPS) no Ministériu Obra Públika (MOP) tun halo intervensaun rasik iha terenu.

Enkuantu Ministériu Solidaridade Sosiál no Inkluzaun (MMSI) akompaña situasaun ne’e hodi foti medida atubele hatán ba situasaun hirak ne’e.

“Ami atualiza ba malu hodi halo avaliasaun no medida ba tempu badak nian, tempu mediu no naruk nian”, nia adianta.

Sorin seluk, Ministru Obra Públika, Salvador Soares dos Reis Pires, informa fatin hirak ne’ebé afetadu maka’as liu maka iha área besik ponte my friend, Mota Becusse no Ponte Maufelu.

“Ha’u simu informasaun katak fatin tolu ne’e maka afeta maka’as hosi inundasaun semana liubá, no daudaun ne’e ami mobiliza ekipamentu pezadu hodi halo atendimentu dezde akontesementu to’o agora. Ami nia atendimentu liuhosi Institutu Jestaun Ekipamentu (IGE,sigla portugés) ne’ebé fahe ba kuaze teritóriu tomak”, nia dehan tan.

Tuir governante ne’e, ekipamentu sira ne’e daudaun kontinua fó asisténsia hodi hasai sedimentasaun no asegura katak kuandu udan-boot fali iha loron tuir mai, sedimentasaun sira ne’e labele provoka fali inundasaun no bele lori estragu barak liután.

“Prioridade agora maka mota-boot hanesan iha Becusse tun ba Aifelu no mós Mota Maloa. Ami kontinua fó asisténsia hodi halo normalizasaun, tanba iha inudasaun ne’e estraga mós sistema kanalizasaun ba bee moos no liña eletrisidade, maibé ha’u fó orientasaun ba ekipa hodi halo reparasaun ba kanu sira ne’ebé maka hetan estragu”, nia subliña.

Ekipamentu pezadu hamutuk nen maka fó atendimentu normaliza sedimentasaun no ekipamentu ne’e hetan ajuda hosi empreza balun.

“Ami husu ba autoridade lokál sira atu kontribui hodi organiza foer sira ne’ebé rezulta hosi inundasaun tanba MOP ninia foku liubá estragu boot no sira seluk ne’e ministériu sira bele ajuda solusiona lixu ne’ebé rezulta hosi inundasaun rasik”, nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here