Xanana Gusmão dadalia hela ho partidu koligasaun foun. Imajen TATOLI/Antónia Gonçalves.

DILI, 16 marsu 2020 (TATOLI)—Portavós Koligasaun Foun atuál Sekretáriu Jerál Partidu Demokrátiku (PD), António da Conçeição, husu Prezidente-Repúblika (PR), Francisco Guterres ‘Lú Olo’, atu pronunsia destinu kolgasaun foun ne’ebé lidera hosi Partidu Congresso Nacional da Reconstrução de Timor (CNRT).

“Koligasaun nafatin hein atu Prezidente Repúblika pronunsia ba prosesu tomak ne’ebé la’o tiha ona, depois dehan koligasaun foun ba hatama ne’e la legal. Entaun, ne’e mak prezidente iha ona desizaun ida klaru. Prezidente labele soe nafatin bola ba kampu klaran depois haruka ema hadau-malu iha laran, ne’e la iha. Dalan demokrátiku la’ós mak ida-ne’e, ne’e prezidente kail (pancing) ema atu baku-malu tán,” Kalohan informa ba jornalista sira, iha Parlamentu Nasionál, segunda ne’e.

Nia hatutan, prezidente tenke deside tiha koligasaun ida-ne’e katak koligasaun ida-ne’e la prenxe rekezitu ka lae.

“Agora prezidente tenke fó nia desizaun ba ami. To’o agora ha’u seidauk simu notifikasaun ruma, aban halo ona semana ida. Ita la hatene se prezidente konsidera situasaun impase ne’e preokupa ka la preokupa,” Portavós Koligasaun Foun ne’e hateten.

Portavós Koligasaun Foun ne’e hatutan, rekezitu ne’ebé xefe estadu husu prenxe ona rekezitu maibé desizaun ba destinu koligasaun ne’e to’o agora seidauk.

Notísia Relevante: Kalohan: Koligasaun Foun Indijita Xanana ba PM Kuandu PR Simu

Jornalista : Evaristo Soares Martins 

Editór      : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here