DILI, 16 marsu 2020 (TATOLI) – Korpu Bombeiru Dili sei koordena ho Servisu Agua no Saneamentu (SAS) no Autoridade Munisípiu Dili atu bele hamoos rai-uut iha estada públiku iha Díli-laran.
Komandante Korpu Bombeiru Dili, Fernando da Costa hateten, sira-nia parte identifika ona area sira iha kapitál Dili ne’ebé rai-uut maka’as hafoin inundasaun iha sesta (13/03/2020).
Area ne’ebé presiza tebes intervensaun tanba rai-uut maka’as mak hanesan area Eskola Portugés-Balide, Xina Rate, Bekusi, Santa Krús, Audian, area Kampu Demokrasia, Kuluhun, Becora, Bidau, Kampu Alor no tesik to’o Fatuhada (Kuartél Jenerál F-FDTL).
“Ami tenta hodi halo koordenasaun ho instituisaun relevante sira hanesan SAS no autoridade Munisípiu Dili hodi hala’o servisu konjunta hamoos rai-uut iha kapitál Dili,” informa Fernando da Costa, ohin, ba ajénsia Tatoli iha nia servisu fatin, Dili.
Maske ho rekursu no fasilidade limitadu, tuir Fernando da Costa, korpu Bombeiru halo esforsu hotu hodi fó atendimentu ba komunidade ne’ebé afetadu hosi dezastre no inundasaun.
Nia informa, korpu Bombeiru hetan apoiu hosi kompañia nasionál ACCCTL hodi kontribui ajuda tanke 10 no karreta 10 atu bele hamutuk ho Bombeiru hodi bele rega rai-uut iha Dili-laran.
Jornalista : Nelson de Sousa
Editór : Francisco Simões
