Ministru Koordenadór Asuntu Ekonómiku interinu No atuál Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen Tatoli/António Gonçalves

DILI, 16 marsu 2020 (TATOLI) – Ministru Koordenadór Asuntu Ekonómiku, Fidelis Manuel Leite Magalhães, informa Sentru Lojístika Nasionál (CLN, sigla Portugés), hato’o pedidu mai parte Ministériu Koordenadór Asuntu Ekonómiku (MKAE), hodi husu Governu sosa tan fós, nune’e bainhira Timor-Leste mosu situasaun emerjénsia ruma bele garantia alimentasaun ba populasaun rai-laran.

Nune’e, Governu sei sosa fós tonelada 3.800 husi rai li’ur ho montante orsamentu $1.958.102.

“Governu hola tiha ona desizaun emediata atu reforsa no dudu lalais liután prosesu pra-estoke nasionál, nune’e ita-nian estoke nasionál bele  sufisiente bainhira iha situasaun urjénsia ida mosu no bele korresponde ba povu nia nesesidade”, dehan Ministru Fidelis ba Agência Tatoli iha ninia knaar fatin, Palásiu Governu, segunda ne’e.

Nia adianta, CLN ninia pedidu ba MKAE aprovadu ona, maibé agora falta solisita ba Primeiru-Ministru, Taur Matan Ruak atu autoriza fundu kontijénsia atubele hatama fós mai husi rai li’ur, nune’e bele ajuda CLN iha estoke nasionál.

Tuir atuál Ministru Reforma Lejizlativa no Asuntu Parlamentár ne’e katak tanba estoke nasionál ne’ebé maka dadaun ne’e la sufisiente atu responde situsaun emerjénsia maka tenke iha alternativa seluk.

“CLN hola ona fós hotu iha ita-nian rai-laran, inklui munisípiu sira, maibé ita-nian produsaun nasionál seidauk sufisiente atu responde ba ita-nian nesesidadade iha rai-laran. Tanba ne’e maka CLN halo tan pedidu ba Governu no sei autoriza sira atu hola iha fós husi rai li’ur”, nia subliña.

Jornalista Natalino Costa

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here