Diretór Jerál Colégio Maliana Pe. Norberto Soares/Imajen Espesiál

DILI, 10 marsu 2020 (TATOLI)–Diretór Jerál Colégio Infante de Sagres Maliana, Pe. Norberto Soares informa, estudante sira ne’ebe eskola iha Colégio Infante de Sagres Maliana hahú hikas ona prosesu aprendijazen iha segunda (09/3/2020) semana kotuk.

Prosesu aprendijazen ne’e foin hala’o fali, nia hatutan, bainhira suspende tiha durante semana rua tanba ahi han Lar femeninu iha Kinta (27 fevereiru 2020) semana hirak liu ba ne’e.

“Atividade eskolares formál hahú hikas iha loron segunda loron 9 fulan Marsu 2020. Ofisialmente hahú hikas ho Missa Agradesimentu ne’ebé prezide husi Bispu Dioseze Maliana Dom Norberto do Amaral no mós hasae bandeira nasionál,” dehan Pe. Norberto Soares, ba Ajénsia TATOLI liuhosi telefone, segunda (16/3/2020).

Antes hahú hikas prosessu aprendijazen, Dirertór Jerál Colégio Infante de Sagres Maliana ne’e informa, realiza enkontru ho inan-aman sira iha loron sábadu (7 marsu 2020) hodi fahe informasaun kona-ba realidade atuál ne’ebé Colégio enfrenta.

Oras ne’e daudaun, tuir nia, ekipa “ad hoc” no badaen sira serbisu makaas hela atu prepara dormitóriu liu ona 75%.

“Agradese ba Maromak ba di’ak tomak ne’ebé ami simu. Ami simu domin, solidariedade, no apoiu tomak atu bele ultrapasa situasaun ida ne’e. Ami hatene katak, ema barak mak hadomi ami ne’ebé hatudu liu hosi orasaun, liafuan korajeen, osan no sasan. To’o oras ne’e daudaun, ema barak mak fó ona tulun barak tebes ba ami,” diretór Jerál ne’e agradese.

Nia mós informa, sasán sira ne’ebé sei presiza mak hanesan Kulsaun 93, sumasu 93, sementu, fatuk, rai-henek, batako, rede, postes ba lutu, no Livru sira parte Colégio sei halo lista ba Ministériu Edukasaun Juventude no Desportu.

“Dala ida tan, Se ami bele husu, atu tulun sira ne’ebé ita-boot sira hakarak fó, bele koordena uluk lai ho ami, nune’e ita bele halo jestaun di’ak liu ba dezastre ida ne’e,” nia fó hanoin.

Entretantu, nia hateten, Ekipa Ad-hoc halo sujestaun ba Bispu Dioseze Maliana kona-ba konstrusaun internatu femeninu ne’ebé ahi han atu konstrui fila fali.

“Internatu ne’e, sei konstrui fila fali iha tempu ne’ebé atu mai. Sei halo dezeñu foun hodi konsidera ba nesesidade hotu internatu nian, liu-liu ba konfortavel no seguransa. Ekipa ad-hoc entrega ida ne’e ba Fundasaun Sagrado Coração de Jesus no Dioseze Maliana mak sei organiza rekonstrusaun ida ne’e. Ekipa sei hato’o sujestaun ruma bazeia ba realidade ne’ebé ekipa hasoru no hanoin,” Padre Norberto subliña.

Entretantu, to’o oras ne’e seidauk iha serteza kona-ba kauza ne’ebé hamosu ahí han Lar Femeninu Colégio Infante de Sagres Maliana, ne’ebe akontese iha Kinta 27 fevereiru tuku 21.35 kalan liu ba ne’e.

Notísia Relevante: Ekipa “Ad Hoc” Ba Ahi Han Colégio Maliana Hahú Hala’o Knaar

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here