Ministra Finansa Ein-Ezersísiu atuál Vise-Ministra Finansa, Sara Lobo Brites. Imajen Tatoli/Egas Cristovão

DILI, 16 marsu 2020 (TATOLI) – Iha reuniaun Konsellu Ministru iha semana kotuk, Governu aprova Proposta Alterasaun datoluk ba Lei orsamentu jestaun finanseira artigu 31, hodi bele fó fleksibilidade ba Governu durante rejime duodesimál.

Haree ba Governu sei enkamiña proposta lei ne’e ba Parlamentu Nasionál (PN), maka Ministra Finansa ein ezersísiu, Sara Lobo Brites husu deputadu sira atu aprova proposta husi Governu ne’e.

“Ami (Konsellu Ministru) aprova ona alterasaun datoluk ba Lei Orsamentu Jestaun Finanseira iha artigu 31, ne’ebé regula kona-ba rejime duodesimál atu permite flesibilidade balun, nune’e Governu liuliu Ministériu Finansa (MF) bele atende pedidu urjénsia no pedidu ne’ebé labele haree de’it ba um doze avos rasik”, tenik Sara Lobo iha plenária bainhira partisipa iha diskusaun kona-ba COVID-19, segunda ne’e

Notísia Relevante: Governu Aprova Proposta Alterasaun Lei Orsamentu no Jestaun Finanseira

Tuir atuál Vise-Ministra Finansa ne’e, proposta ne’e tékniku sira halo hela redasaun finál no tempu badak sei lori ba Parlamentu atubele konsidera.

“Úniku situasaun ne’ebé maka bele ajuda ita iha situasaun ida-ne’e maka alterasaun ba artigu 31. Tanba meiu hotu Ministériu Finansaaprezenta ona ba Konsellu Ministru, maibé tanba interpretasaun legál sira ba lei sira ne’e maka iha abilidade interpretasaun oioin, entaun la fó solusaun mai Ministériu Finansa atu atende bainhira proposta hosi ministériu sira ultrapasa valór ne’ebé ita fixa iha rejime duodésimu nian”, nia akresenta.

Nia subliña, MF fó apoia tomak ba proposta ne’e maibé presiza mós apoia hosi deputadu sira atubele fó aprovasaun ba proposta, nune’e bele atende situasaun ne’ebé sei afeta ba ita-nia nasaun.

Governante ne’e esklarese ba reprezentante povu katak, iha jeneiru no fevereiru, Governu fixa ona orsamentu duodésimu ba kada fulan hamutuk millaun $116 no iha fulan-rua ne’e ezekuta de’it pur volta porsentu 46 iha janeiru no porsentu 44 fevereiru, enkuantu iha marsu fixa nafatin montante ne’ebé hanesan.

Nune’e iha janeiru, Governu hahú ho saldo hosi tinan kotuk (2019) nian, pur volta millaun $290 no reseita ne’ebé rekada iha janeiru hamutuk millaun $18, tantu iha fin fevereiru saldo tezouru mantein ho millaun $215.

“Konserteza saldo ne’ebé maka iha sei naton atubele finansia situasaun saida de’it mak nasaun infrenta durante marsu to’o abríl. Tanba ne’e maka iha okaziaun lubuk ida ami informa katak montante ne’ebé fixa millaun $116, hafoin ho situasaun ne’ebé maka hanesan dezastre naturál no Coronavírus ne’ebé maka tenke halo prevensaun, no kombate. Tanba ne’e la’ós de’it iha área saúde nia parte maibé abranze ba iha setór sira seluk ami haree katak iha nesesidade atu halo proposta ruma mai Parlamentu atubele iha ninia kontinuidade iha maiu”, Sara informa.

Nia refere liután, rejime duodésimu iha limitasaun, ne’ebé só aplika um doze avos ne’ebé maka bazeia ba orsamentu 2019 nian despeza ne’ebé karik akontese atu atende situasaun sira ne’ebé nasaun infrenta hela.

“Fonte únika ne’ebé bele rekorre maka rezerva kontijénsia, entretantu rezerva ne’e mós ita iha limite tanba iha 2019 rezerva kontijénsia pur volta millaun $26 entaun bainhira fahe ba kada fulan hetan millaun $2,229”, nia esplika liután

Entretantu proposta husi Ministériu Saúde (MS) relasiona ho Coronavírus ka COVID-19, ne’ebé sei inferiór hosi montante ne’ebé maka rezerva kontijénsia bele prevee ba kada fulan durante rejime duodésimu.

Tanba ne’e, karik montante ne’e ultrapasa ona montante ne’ebé prevee ba kada fulan maka Ministériu Finansa iha difikuldade tebes atu atende pedidu ne’ebé la’ós de’it hosi MS, maibé bele mai mós husi ministériu sira seluk tanba asuntu Coronavírus la’ós de’it MS maka toma konta maibé kobre ona área lubuk ida, liuliu área ekonomia ne’ebé bele sai ona preokusaun hotuhotu nian, tanba bainhira Estadu deside situasaun emerjénsia maka afeta ba ekonomia, liuliu ba sidadaun hotu.

“Entaun ami haree katak iha rejime duodésimu ne’e tenke iha duni flesibilidade balun atu permite Governu bele toma medida”, nia sujere

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here