Abitante suku Talimoro, Postu Administrstivu Gleno, Munisípiu Ermera hetan fenenoma gás lakan bainhira fura bee posu. Imajen/IPG

DILI, 16 marsu 2020 (TATOLI) Abitante Suku Talimoro, Postu Administrstivu Gleno, Munisípiu Ermera hetan gás lakan bainhira fura bee posu.

Koordenadór Kampu Peskiza no Xefe Unidade Petróleu no Gás, Joanico Pires, informa Institutu Petróleu no Jeolojia (IPG,sigla portugés) hahú halo observasaun ba fenómena gás ne’ebé mosu suku Talimoro.

Tuir Xefe Ekipa ne’e, fenómena gás ne’ebé mosu iha fatin refere fásil atu lakan bainhira sunu no área refere lokaliza pur volta kilometru 30 husi súl sidade Dili.

“Fenómena gás komesa mosu bainhira ita-nia komunidade iha Suku Talimoro tenta hela hodi halo perfurasaun komunitária hodi asesu ba bee-moos atu konsumu ba sira-nia nesesidade loron-loron nian, maibé infelizmente bainhira prosesu perfurasaun ne’e la’o hela mosu fali ahi-lakan husi perfuransaun ka gás ne’ebé deside kedas hodi hapara perfurasaun,” tenik Xefe Unidade Joanico ba Agência Tatoli, iha ninia knaar fatin, Elemloi-Dili, sábadu ne’e.

Ho nune’e, Dirijente ne’e akrestan rezultadu estudu prelimenáriu husi IPG atualmente liuhosi observasaun ekipa tékniku seidauk hetan rezultadu ikus kona-ba kauza loloos husi fenómena manifestasaun gás refere.

Nia refere liután, ekipa tékniku deskonfia katak iha posibilidade rua ne’ebé sai hanesan kauza ba manisfestasaun gás ne’e maka posibilidade kauza husi Biogas ne’ebé mai husi sintina kuak ne’ebé besik posu bee-matan no manifestasaun ida ne’e bele kauza husi lensa biojenik gás ne’ebé eziste no akumula iha rai-okos, ne’ebé deskonfia rezulta husi materiál orgániku ne’ebé depózitu iha rai okos.

“Posibilidade hirak ne’e bazeia ba karaktér husi Biojenik gás ne’ebé dala-barak hatudu fizikamente laiha iis no fásil rezulta ahi-lakan bainhira hetan sunu no presaun ne’ebé ki’ik,” nia akresenta.

Nia afirma tan, karaktér Biojenik gas hirak ne’e relevante ho informasaun ne’ebé ekipa identifika iha fenómena manifestasaun gás refere.

Ho nune’e, husi rezultadu observasaun indika mós katak fenómena refere la ejiste gas ne’ebé bele fo impaktu ladi’ak ba komunidade lokál iha área ne’e.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here