Primeiru-Ministru, Taur Matan Ruak. Imajen Tatoli/Egas Cristovão

DILI, 14 marsu 2020 (TATOLI) – Primeiru- Ministru (PM), Taur Matan Ruak, iha esperansa katak Deputadu sira iha Parlamentu Nasionál (PN) sei halo aprovasaun ba Proposta husi  Konsellu Ministru, hodi halo levantamentu millaun $250 husi Fundu Petrolíferu (FP) hodi sustenta mákina Estadu.

“Ha’u fiar katak sira sei aprova, maibé sé la aprova ita-nia nasaun paradu tanba osan laiha. Ha’u espera katak Nai Deputadu sira bele komprende situasaun no fó apoiu ba ida-ne’e,” tenik PM Taur iha Salaun Catedral Vila-Verde, sábadu ne’e.

Tuir planu, semana oin Ministériu Finansa (MF) sei aprezenta Proposta Konsellu Ministru ba PN atu husu autorizasaun levantamentu osan.

Notísia Relevante: Governu Sei Halo Levantamentu Millaun $250 Husi FP Sustenta Mákina Estadu

Iha sorin seluk, Sekretáriu Jerál Partidu FRETILIN, Mari Alkatiri, afirma partidu istóriku ne’e ninia pozisaun sei apoia ba Proposta Governu.

“Ha’u garante Bankada FRETILIN iha Parlamentu sei apoia levatamentu Fundu Petrolíferu atu uza ba duodésimu nune’e bele sustenta makina Estadu”, Alkatiri adianta.

Antes ne’e, Ministra Finansa ein ezersísiu, Sara Lobo Brites, informa semana oin MF sei aprezenta proposta ba ezekutivu sira kona-ba levantamentu osan husi FP.

Tuir proposta ne’ebé Ministériu Finansa sei aprezenta ba Parlamentu hamutuk millaun $250, ne’ebé montante ne’e iha dentru montante husi Rendimentu Sustentável Estimadu (RSE).

Nia refere liután, kona-ba saldo dadaun ne’e sei iha montante millaun $215. Dotasaun Orsamentu Temporáriu (DOT) ba fulan-tolu tutuir malu fixa ho montante millaun $116, entaun saldo agora iha millaun $215. Reseita doméstika média pur volta millaun $15 kada fulan, entaun bainhira  fixa kada fulan duodésimu ho montante millaun $116 no sukat ho saldo agora ne’e to’o de’it ba fulan-rua.

Governante ne’e haktuir, iha esperiénsia fulan- jeneiru no fevereiru, ezekusaun menus hosi millaun $116, pur volta millaun $50-resin. Ho hanoin ida katak bainhira ezekusaun maka konstante ka mantein nafatin porsentu 50 de’it maka ninia montante ne’e sei bele kobre to’o fulan-haat.

Tuir nia, bainhira liga ho aprovasaun ba alterasaun datoluk Lei Orsamentu no Jestaun Finanseira númeru 13/2019 artigu 31, ne’ebé maka ko’alia kona-ba rejime doudésimu, númeru ne’e fó esesaun iha artigu 31 no fó biban Governu atubele atende nesesidade sira ne’ebé maka boot hanesan selu dívida públika ne’ebé loron pagamentu monu iha fulan-marsu no ninia montante ladun boot.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here