DILI, 12 marsu 2020 ( TATOLI)–Xefe Diresaun Vulneravel Person Unit (VPU) Polisia Nasionál Timor-Leste (PNTL), Inspetór Ricardo da Costa informa, hahú husi tinan 2011 to’o marsu 2020, VPU-PNTL rejista kazu infantisídiu hamutuk 48.

Nia informa, hosi kazu refere akontese iha munsípiu hotu maibé  iha munisípiu rua mak laiha kazu infantisídiu mak hanesan Munisípiu Covalima no Munisípiu Manatuto.

“Ami rezistu kazu infatisídiu hahú husi 2011 to’o mai fulan marsu 2020 hamutuk 48. Husi kazu 48  ne’e, 28 husi munisípiu sia (9) inklui Reziaun Administrativa Espesiál Oé-Cusse Ambeno (RAEOA) no 20 husi Dili. Husi kazu hirak ne’e, parte VPU detekta seksu femeninu 20, maskuliñu 14 no sira ne’ebé deteta seksu ne’e 14. As liu mak iha Munisípiu Dili,” dehan Xefe Inspetór, Ricardo da Costa, ba Ajénsia Tatoli hafoin partisipa Semináriu Nasionál ba loron feto Mundiál iha Salaun CNE, Dili, kinta (12/3/2020).

Nia hatutan, durante ne’e husi parte VPU nian atende ba kazu infantesídiu katak fatór ba kazu refere mak sira moe kous labarik, tauk família no dala ruma tanba kultura.

“Kuandu hetan autór sira ne’e sira konfesa ka hato’o mai ami katak sira halo ida akontese tanba sira tauk família, moe ba sosiedade, no kultura  família nian. Entaun, ita haree katak dala ruma família lakohi simu mane ka feto. Entaun, sira deside bele estraga labarik ne’e,” nia dehan.

Inspetór ne’e hatutan, meiu ne’ebé durante sira uza ba kazu infantisídiu mak sira vizita ona eskola sekundária sira iha Dili laran, hodi fahe informasaun ba estudante sira kona-ba oinsá uza telemóvel ho di’ak.

“Meiu ne’ebé agora ami halo ne’e mak komesa vizita eskola sekundária sira iha Dili hodi fó edukasaun ba sira oinsá para  utilizasaun telemóvel ne’e tuir nia dalan. Tanba, ita hatene katak agora ne’e fatór importante ida mak telemóvel. Fó korazen ba sira katak kuandu akontese kazu hanesan ne’e, labele tauk atu halo keixa tanba polísia prontu atu asegura imi,” nia subliña.

Nia hatutan, programa ne’ebé sira hala’o  tama sai eskola fó sensibilizasaun ba estudante sira foin mak hala’o iha Munisípiu Dili, seidauk ba munisípiu sira seluk tanba sira hakarak fó formasaun uluk ba eskola ensinu sekúndaria sira iha Dili.

Notísia Relevante: Labarik Feto Sira Saudável Tenke Hapara Kaben Sedu

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here