Logotipu Tane Konsumidór. Imajen/Espesiál

DILI, 15 marsu 2020 (TATOLI) Relasiona ho selebrasaun Loron Mundiál Direitu Konsumidór iha sábadu (15/03), TANE Konsumidór ne’ebé hanesan asosiasaun ne’ebé durante ne’e fó advokasia ba konsumidór, propoin ba Estadu Timor-Leste kona-ba kestaun importante tolu relasiona ho eletrisidade.

Kestaun hirak ne’e maka hanesan Lei Servisu Públiku esensiál ba eletrisidade ninian, harii órgaun reguladora ba eletrisidade no selebrasaun akordu entre komersializadór no konsumidór ba liña kontadór eletrisidade.

Liga ba loron mundiál konsumidór, TANE hili tema servisu públika esensiál no hili  eletrisidade nu’udar no servisu públika esensiál tanba konsidera eletrisidade nu’udar revendiksaun ba Governu atu bele rezolve.

Prezidente Asosiasaun Tane Konsumidór, António Ramos da Silva, afirma asosiasaun ne’e husu estadu atu konsidera kestaun ne’ebé koloka ona.

“TANE ninia pozisaun iha selebrasaun loron mudiál direitu konsumidór, maka ami propoin ba Estadu atu konsidera kestaun tolu importante husi servisu públiku ne’ebé esensiál ba eletrisidade hanesan lei esensiál sira ba sevisu públiku ba eletrisidadade ninian, ne’ebé Estadu hahú hanoin atu harii ona autoridade órgaun reguladora ba eletrisidade no selebrasaun akordu entre komersializadór ho konsumidór ba liña  kontadór eletrisidade”, tenik António Ramos ba Agência Tatoli iha ninia knaar fatin, iha Villa-Verde, sesta ne’e.

Tuir nia, Lei esensiál sevisu públiku ba  eletrisidadade nian ladún iha fundamentu atu defende ba konsumidór sira-nian direitu, tuir lei 8/2016 kona-ba direitu konsumidór sira, ne’ebé iha kestaun legál no mós kestaun estruturál ne’ebé presiza hadi’a.

Husi prespetiva ida ne’e, TANE nia haree katak presiza kolaborasaun Governu atu halo kompletu kuadru legál sira, liuliu lei konsumidór artigu 8/2016 rasik ne’ebé maka balun konsidera sei falta.

“Ezemplu tenke define ona lei protesaun  konsumidór sira hanesan ahi nu’udar sasán públika ezensiál, tanba ne’e presiza iha ona lei ida atu define.

Prezidente asosiasaun ne’e rekoñese, presiza iha diploma ministeriál atu regulariza hanesan prátika abuziva, kuadu atu selu sansaun sira hasoru eletrisidade maka uza lei numeru 8/2016, maibé lejizlasaun la temi tanba ne’e maka presiza diploma ruma, atu nune’e bele kompleta ba lei ne’ebé iha ona.

Nia realsa, TANE nu’udar reprezentante sidadaun ne’ebé prontu envolve iha diskusaun no eleborasaun ba lejizlasaun tanba bele reprezenta konsumidór sira.

“Lei iha maibé kuandu ninian aplikasaun ne’e seidauk kompletu, dalaruma ita identifika seidauk regulariza ho di’ak”, nia akresenta.

Ezemplu iha nasaun balun hanesan Portugal no Brazil rasik iha kontestu lian portugés nian, sira tenke regulariza lei ho di’ak, públikasaun ne’e hanesan obrigasaun ba Estadu nian tuir dekretu-lei no lei sira iha rai seluk kona-ba kodigu ba konsumidór sira.

Tuir nia, iha loron internasionál ba konsumidór, TANE propoin prinsípiu universál sira tanba presiza iha kontinuidade seguransa ba protesaun konsumidór.

Nia dehan tan, ho diploma ministeriál ida bele kompleta ona kuadru legál husi lei numeru 8/2016 kona-ba protesaun konsumidór nian tanba Timor-Leste nu’udar nasaun ida ne’ebé subskreve iha dokumentu objetivu dezenvolvimentu miléniu atu redús kiak no konsumu sustentável no halo badak desigualdade. Tanba ne’e, Estadu preiza define duni eletrisidade hanesan sasán públiku ne’ebé esensiál.

Kestaun segundu ne’ebé maka TANE rekomenda  maka husu Estadu atu hafahe servisu Eletricidade de Timor-Leste nu’udar Empreza Públika no kria órgaun autoridade reguladór nune’e bele halo servisu ho di’al liután.

Tanba daudaun ne’e, tuir Tane nia haree EDTL difísil halo servisu nu’udar ben públiku ne’ebé esesnsiál hodi fó satisfasaun ba komusmidór sira.

“Ami identifika katak sentralizasaun podér iha entidade ida de’it ne’e mós ladun fó benefisiu barak liu ba konsumidór sira tanba se  ha’u maka produz ha’u maka faan no  hau maka regulariza rasik  ne’e laiha balansu”, salienta António Ramos.

Tanba ne’e estadu liu husi governu presiza harii organun reguladór ida nune’e fasil atu rezolve problema eletrizidade iha Timor-Leste.

“Ami labele halo buat ida kuandu konsumidór sira mai hato’o sira-nian preokupasaun no problema kona-ba eletrisidade nian no ami atu enkamiña ba ne’ebé problema sira ne’e ita haree EDTL nian podér ne’e sentralizadu no laiha órgaun reguladora ida”, nia dehan tan.

Kestaun tolu ne’ebé maka TANE propoin ba Governu atu tau atensaun maka tenke iha selebrasaun akordu entre EDTL nu’udar komersializasaun ho konsumidór sira.

“Ita iha Timor-Leste ba monta kuadru pre-pagu iha konsumidór nia-uma, laiha konkordánsia ba monta de’it, Governu halo lei ida iha selebrasaun akordu entre EDTL nu’udar komersializasaun ho komsumidór sira maka foin ba monta”, nia salienta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here