Primeiru-Ministru, Taur Matan Ruak. Imajen Tatoli/Egas Cristovão

DILI, 14 marsu 2020 (TATOLI) – Primeiru Ministru (PM), Taur Matan Ruak, hateten FRETILIN hanesan partidu mais votadu iha eleisaun 2017 no 2018, tanba ne’e partidu istóriku ne’e iha papél importante atu ajuda buka solusaun rezolve impase polítika hodi garante konstrusaun nasaun, estabilidade no pás iha Timor-Leste.

“Ha’u hakarak ko’alia ho konfresista sira hotu iha partidu FRETILIN nian, pesoalmente ba maun Marí Alkatiri (Sekretáriu Jerál FRETILIN). ha’u hakarak ita bo’ot sira pro-ativu atu ajuda buka solusaun ida di’ak hodi rezolve impase polítika”, diskursu PM Taur iha Konferénsia dahaat ho tema “Aprofundar a Aliança com o Povo e Garantir a Construçào e a Unidade da Nação”, iha Salaun Catedral Vila-Verde, sábadu ne’e.

Tuir Xefe Governu, iha sistema demokrasia partidu mais votadu hanesan FRETILIN iha podér  forte ne’ebé tenke book-an uluk ba koesaun sosiál no polítika iha nasaun hodi hetan komplementár husi partidu ki’ik sira.

Nia realsa, hafoin eleisaun iha tinan-2017 no 2018 iha situasuan ne’ebé iha aranzu polítika ida kona-ba maioria parlamentár hodi harii Governu, maibé infelizmente foin daudaun deputadu sira ho votu maioria la konsege aprova orsamentu iha Parlamentu Nasionál.

Ho nune’e, eis Prezidente Repúblika ne’e felisita no husu ba konfresista Partidu FRETILIN iha konferénsia nasionál ne’e, atu ajuda kontribui buka solusaun ba impase polítika iha Timor-Leste.

“Ha’u fó parabéns ba konfresista sira no espera ita bo’ot sira bele kontribui buka solusaun ba tempu oin mai, liuliu tinan-rua nia-laran ne’e atu garante estabilidade iha ita-nia nasaun”, PM Taur akresenta.

Xefe Ezekutivu ne’e adianta, Prezidente Repúblika, Francisco Guterres Lú Olo antes ne’e ko’alia ona ho lideransa nasionál sira no Partidu Polítiku (parpol) sira, ho hanoin ida katak eleisaun antesipada hanesan últimu rekursu no husu ba parpol sira atu halo aranzu polítika no mantein Primeiru-Ministru atuál kontinua asume ninia funsaun ho normalidade.

“Nia (Prezidente Repúblika) konsulta ita, maibé nia deside tuir ninia konsiénsia no vizaun ho baze interese no objetivu nasaun-nian ba estabilidade no garante governativa”, nia salienta.

Xefe Governu rekoñese, durante ne’e iha koligasaun foun ne’ebé lideradu husi partidu CNRT no aprezenta ona ba Xefe Estadu, maibé husu atu kompleta rekezitu balun tuir lei parpol nian.

“Koligasaun foun-ne’e aprezenta ona, maibé  lejitimidade ne’e iha pergunta. Sera que sira forte, sé ho tolu la forte ho neen-ne’e forte fali ida ne’e ita tau kestaun ida”, nia argumenta.

Tanba ne’e, tuir nia Xefe Estadu hakarak deside buat ida ne’ebé tenke garante katak iha estabilidade governativa.

“Maski nune’e ita la taka dalan ba eleisaun antesipada, maibé ha’u lahatene ita-nia populasaun sei iha pasiénsia kuandu ita filafali ba eleisaun”, nia dehan tan.

Nune’e, Primeiru Ministru husu ba konfresista FRETILIN atu iha senáriu foun ne’e bele buka solusaun hamutuk tanba eleisaun ne’e tenke akontese de’it iha tinan-2022 eleisaun prezidensiál no 2023 ba eleisaun parlamentár.

“Partidu sira iha Parlamentu Nasionál ne’e atu manan saida bainhiea ba iha eleisaun agora. Importante liu buka solusaun atu rezolve impase polítika atu asegura kompetisaun ida iha tinan-2023 bele di’ak liu”, nia konklui.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here