Plantasaun Kafé. Imajen/Timor-Leste Tourism

ERMERA, 14 marsu 2020 (TATOLI) Prezidente Autoridade Munisípiu Ermera, José Soares, relata tuir dadus ne’ebé iha, kuantidade esportasaun kafé ba tinan ida-ne’e tun tebes tanba kauza husi mudansa klimátika.

“Sim klaru, kuadu 2016 ha’u mai ne’e dadus husi Kooperativa Kafé Timór (CCT-sigla portugés) no Asosiasaun Kooperativa Negósiu Nasionál (NCBA-sigla inglés), katak ita konsege halo esportasaun pur volta 14.000 to’o 16.000 tonelada kada tinan, maibé tinan-ne’e iha 4.000 tonelada. Ida ne’e hanesan dadus ne’ebé ami hetan husi CCT Ermera”, nia tenik iha East Timor Coffee Institute (ETCI) Ermera, sábadu ne’e.

Tuir dadus ne’ebé iha, tinan ida-ne’e produsaun no kuantidade ba esportaun kafé tun kuaze pur volta 7.000 tonelada.

Nia esplika liután, daudaun ne’e Kafé Ermera hasoru hela problema tanba kauza husi mudansa klimátika no kauza bai-loron naruk  halo ai ne’ebé fó mahon ba kafé mate.

“Ha’u hanoin liuliu ba kafé Arábika ne’ebé la tahan ho manas no ha’u sente kafé Rebusta sei bele tahan maibé Arabika labele”, Jóse akresenta.

Nia realsa, parte Autoridade Munisípiu Ermera  halo ona koordenasaun ho Ministériu Agrikultura no Peska (MAP) atu haree ba kestaun ne’e, oinsá haree ba polítika ministériu nian ba reflorestasaun kafé ba kintál kafé sira.

“Ida-ne’e maka ami halo hela no husu Ministériu Agrikultura no Peska ninia kolaborasaun, maibe ita mós hetan apoiu husi Nova Zelándia no nasaun parseiru sira balun ne’ebé hakarak apoia atu hadi’a kualidade kafé“, nia afirma.

Autoridade Munisípiu ne’e adianta, hanesan Ermera-oan nia parte preokupa kafé nian produsaun labele tun, tanba bainhira tun bebeik maka kafé Ermera sei lakon.

Ermera rasik iha produtu kafé no daudaun ne’e komunidade Ermera hahú prodús produtu baunilla tanba  iha valór ekonómiku ne’ebé aas.

“Horisehik ha’u ba lansa ona kuda baunilla iha suku Railaco kraik ne’ebé ajuda husi Organizasaun Naun Govermentál (ONG) husi Austrália, Mey Mavlop, hodi ajuda komunidade sira iha Baunilla no la’os ba komunidade sira maibé iha Railaco de’it maibé komunidade suku Leorema”, informa Autoridade Munisípiu Ermera ne’e.

Tuir nia, aleinde produtu baunilla, iha mós produtu Maek ne’ebé maka komunidade Ermera oras ne’e hahú tau importánsia.

Iha fatin hanesan, Prezidente Kámara Komérsiu Industria (CCI-TL) Ermera, Luís Alves, reforsa katak nia parte triste ba kuantidade esportasaun kafé ne’ebé maka tun.

“Tanba ne’e nu’udar Prezidente CCI-TL Ermera hamutuk autoridade Ermera sei koordena ho Ministériu Agrikultura Peska, atu haree posiblidade balun ba reflorestasaun kafé iha munisípiu Ermera. Nune’e bele hasa’e kuantidade produsaun no esportasaun kafé ba rai li’ur”, nia dehan tan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here