Sekretáriu Jerál Partidu FRETILIN, Mari Alkatiri. Imajen Tatoli/ Egas Cristovão

DILI, 14 marsu 2020 (TATOLI) – Iha Konferénsia Nasionál Partidu Frente Revolucionário de Timor-Leste Independente (FRETILIN) ba dahaat, deside fó kompeténsia ba Sekretáriu Jerál FRETILIN, Marí Alkatiri atu buka dalan solusiona impase polítika iha Timor-Leste.

“Ohin, konfresista sira deside fó mandatu no kompeténsia outónomu ba ha’u atu buka dalan atu sai husi impase polítika, maibé mandatu ne’e signifika atu hahú maibé ha’u seidauk bele dehan bainhira mak akontese,” tenik Alkatiri hafoin Konferénsia Nasionál FRETILIN, sábadu ne’e.

Nia dehan, mandutu ne’ebé fó husi konfresista sira ne’e sei hahú hafoin desizaun Prezidente Repúblika, Francisco Guterres Lú Olo ba proposta koligasaun foun ne’ebé aprezenta husi Partidu CNRT, PD, KHUNTO, UDT/FM no PUDD.

“Ha’u bele dehan de’it katak hein desizaun husi Prezidente Republika. Bainhira simu ona proposta husi koligasaun foun ne’e, entaun prontu no pasiénsia FRETILIN sei kontinua iha opozisaun, maibé la simu signifika katak rejeita entaun FRETILIN hanesan partidu mais votadu  iha obrigasaun atu ajuda Estadu tomak atu buka solusaun”, nia realsa.

Ho nune’e, lideransa partidu FRETILIN ne’e afirma katak dezisaun husi Konfénsia Nasionál fó kompeténska atu buka dalan solusiona impase polítika tanba FRETILIN hanesan partidu mais votadu.

“Purtantu dalan ne’e ita buka enkuantu ita seidauk sai husi nakukun, ita labele sai fali Maromak atu dehan saida mak Prezidente Repúblika sei deside”, nia adianta.

Nia subliña, bainhira Prezidente Repúblika rejeita proposta koligasaun foun ne’ebé lidera husi CNRT, maka FRETILIN sei buka kontaktu ho partidu sira atu viabiliza Governu atubele ukun to’o 2023.

“Ho CNRT laiha kontaktu no ha’u sei la kontantu ho CNRT. Ha’u hateten dala barak ona, mais ba ho PLP ne’e prontu. Sé kaer posizaun saida de’it ami sei diskute tanba FRETILIN mós laiha interese atu ukun ka lidera tinan-rua”, nia afrima.

Tanba ne’e, Alkatiri adiata FRETILIN hanesan partidu mais votadu hakarak viabiliza de’it Governu ida atu ukun tan tinan-rua ho balun to’o 2023.

Iha konférensia Nasionál, eis Primeiru-Ministru ne’e konvida partidu ki’ik sira ne’ebé hetan asentu iha Parlamentu Nasionál hodi hatudu katak FRETILIN loke dalan ba demokrasia iha rai ida ne’e.

Entretantu, koligasaun foun asina akta iha sábadu 22 fevereiru, reprezenta husi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta dos Santos, Prezidente ein ezersísiu UDT, Rudolfo Aparício Guterres, Prezidente ein ezersísiu Frente Mudansa, Egídio de Jesus no Prezidente PUDD, António de Sá Benevides.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here