Prezidente Repúblika, Francisco Guterres Lú Olo. Imajen/TATOLI

DILI, 13 marsu 2020 (TATOLI)–Prezidente Repúblika (PR), Francisco Guterres “Lú Olo”, simu ona dokumentu sira husi Koligasaun foun no oras ne’e kontinua estuda hodi haree legalidade hosi Koligasaun foun refere.

“Ha’u seidauk bele hateten ida ne’e, ha’u sei Estuda dokumentu sira ne’e hotu, to’o remata ha’u sei fó sai kona-ba buat ne’e loos ka la Loos,” dehan  Prezidente Repúblika “Lu Olo” ba jornalsita sira hafoin hamutuk ho komunidade kuda ai-parapa oan iha área Tasi ibun Wenunuk, Postu Administrativu Metinaro, Munisípiu Dili, ohin.

Entretantu, koligasaun foun iha ona, liu husi asina akta iha sábadu 22 fevereiru, reprezenta husi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta dos Santos, Prezidente Ein Ezersísiu UDT, Rudolfo Aprarício Guterres, Prezidente Interinu FM, Egídio de Jesus, no Prezidente PUDD, António de Sá Benevides.

Koligasaun Foun ne’e rasik, halo ona audiénsia ho Prezidente Repúblika iha loron 6 fulan ne’e, maibé la prenxe rekezitu balun, liuliu Prezidente Repúblika husu atu partidu ida-idak hosi Koligasaun ne’e rasik halo ninia kongressu.

Nune’e, hahú kedan iha loron 7 fulan ne’e, partidu hotu-hotu hosi Koligasaun Foun realiza ona konferénsia no iha loron 10 fulan ne’e, Koligasaun Foun reprezenta husi sekretáriu Jerál Partidu Demokrátiku no porta vós António da Conceição, submete fali karta pedidu audiénsia ba Prezidente Repúblika hodi konfirma tan dala ida, koligasaun ninia disponibilidade, atu forma Governu konstitusionál.

Notísia Relevante: Koligasaun Foun Entrega Karta Audiénsia Daruak ba Prezidente Repúblika

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here