Sekretáriu Estadu Formasaun Profesionál no Empregu (SEFOPE), Julião da Silva. Imajen/Egas Cristovão.

DILI, 13 marsu 2020 (TATOLI) – Governu liuhosi Sekretaria Estadu Formasaun Profisionál no Empregu (SEFOPE) iha sesta ne’e, husik tan traballadór hamutuk na’in-12 hodi ba servisu iha Austrália iha programa Pacific Labour Scheme.

Iha seremónia despedida ba traballdór, Sekretáriu Estadu Formasaun Profesionál no Empregu, Julião da Silva husu ba traballdór sira atu hatudu nafatin servisu di’ak nune’e empreza na’im bele tau konfiansa nafatin.

“Ha’u husu ba imi atu hatudu servisu ne’ebé di’ak no kontinua loyal ba empreza-na’in, nune’e sira bele tau nafatin konfiansa atu imi bele servisu no hetan osan hodi kontribui ba dezenvolvimentu ekonomia família”, tenik Julião da Silva hafoin ramata seremonia despedida ho traballdór iha Salaun SEFOPE, sesta ne’e.

Nia dehan, maski timoroan balun ne’ebé servisu iha Autrália tuir relatóriu SEFOPE katak dala-ruma iha dezentendimentu iha servisu fatin, maibé ida-ne’e bele rezolve entre empreza ho traballdór sira liuhosi Adidu Traballdór Austrália.

“Ha’u hanoin maske mosu dezentendimentu ki’ik siramaibé ida-ne’e la fó impaktu tanba bele rezolve husi ita nian adidu sira iha ne’ebá. Tanba ne’e, ha’u hakarak enkorza ita bo’ot hodi hatudu servisu di’ak nune’e bele loke oportunidade ba joven sira seluk iha Timór ne’ebé hakarak ba servisu iha Austrália”, nia katak.

Governante ne’e mós husu ba inan, aman no parente husi traballdór sira tenke mantein komunikasaun bainhira hetan problema ruma bele komunika ba SEFOPE hodi buka solusaun.

“Ha’u husu ba famíla sira mós tenke halo komunikasaun nafatin ho sira nia-oan, tantu fen no laen, nune’e bainhira iha problema ruma tenke informa ba iha SEFOPE hodi buka solusaun no ha’u mós husu ba traballdór sira tenke respeita família, liu-liu ba fen no laen sira tenke respeita osan ne’ebé manda ba família labele uza ba buat seluk”, nia akresenta.

Nune’e, governante ne’e husu ba traballadór sira atu kuidadu-an iha Austrália tanba daudaun ne’e sirkulasaun Coronavirus alarga ona to’o Austrália.

“Imi tenke kuidadu saúde tanba agora daudaun iha moras Coronavirus. Moras ida-ne’e agora fó ameasa ba mundu tanba halakon ema barak nia vida no agora alastra ona ba nasaun sira inklui Austrália. Tanba ne’e tenke kuidadu-an no labele la’o arbiru”, nia subliña.

Iha sorin seluk, Diretór Empregu Exterior, Filomeno Soares, informa traballdór na’in-12 ne’e hetan ona kontaktu husi empreza balun iha Austrália iha semana hirak liubá.

Nia realsa, traballadór sira ne’e sei ba servisu durante tinan-tolu nia-laran no sei aranka iha fulan ida-ne’e niaalaran.

“Tanba ne’e ohin sira halo despedida ho SEFOPE no asina deklasaun ho SEFOPE antes sira aranka”, nia salienta.

Iha seremonia despedida ho traballdór na’in-12 ne’e alende asina deklarasaun, konta mós ho partisipasaun husi família sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here