Sekretáriu Estadu Formasaun Profisionál no Empregu, Julião da Silva. Imajen Tatoli/Egas Cristovão.

DILI, 13 marsu 2020 (TATOLI) Governu Alemaña liuhosi Ajénsia Gesellschaft für Internationale Zusammenarbeit (GIZ) fó ona kapasitasaun ba joven sira iha área oinoin liuhosi ninia programa.

Sekretáriu Estadu Formasaun Profesionál no Empregu, Julião da Silva, lori Governu Timor-Leste agradese ba inisiativa ida-ne’e

“Kontente tebes tanba liuhosi programa indigo ne’ebé Governu Alemaña oferese husi Ajénsia GIZ, bele fó ona apoiu hodi kapasita ita ninia joven sira liuhosi kapasitasaun iha área oinoin hanesan promosaun kareira ba joven sira ne’ebé maka ramata ona sira ninia estudu iha sekundáriu, bele hatene foti desizaun saida maka sira halo bainhira kontinua fali sira nian estudu iha ensinu superiór”, tenik Julião da Silva ba Agência Tatoli hafoin ramata enkontru ho GIZ, sesta ne’e.

Tuir Governante ne’e, programa kapasitasaun ne’e rasik nu’udar programa pilotu ne’ebé maka  Governu Alemaña liuhosi GIZ tulun Sekretaria  Estadu Formasaun Profesionál no Empregu (SEFOPE) kapasita rekursu umanu.

“Programa ne’e hala’o ona iha munisípiu rua Hanesan Viqueque no Lospalos, nune’e programa ne’e rasik la’o desde tinan-2017 to’o tinan ne’e atu ramata”, nia akresenta.

Governante ne’e realsa, parte Governu SEFOPE kontinua fó apoiu iha  programa ida-ne’e hodi kontinua la’o tanba iha ona joven benefisiáriu barak maka tuir formasaun ne’e.

“Benefisiáriu husi programa ne’e maka joven hamutuk 10.000 no ita kontinua nafatin prevee osamentu iha 2020 maibé sumba. Ita nafatin sei prevee osamentu iha Governu foun mai, nune’e bele fó kapasitasaun ba joven sira ho di’ak liután”, nia salienta.

Nune’e, nia espera ba-oin programa indigo ne’e sei alarga ba munisípiu sira seluk iha Timor-Leste.

Nia subliña, parte Alemaña rasik kontinua hatudu prontidaun atu ajuda Governu Timor-Leste liuhosi SEFOPE atu kapasita joven sira

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here