Prezidente Repúblika, Francisco Guterres Lú Olo, akompañadu husi Primeiru-Ministru, Taur Matan Ruak no Prezidente Tribunál Rekursu, Deolindo dos Santos, sesta (13 marsu 2020), kuda ai-parapa iha tasi-ibun Metinaro. Imajen Tatoli/ Cipriano Colo

METINARO, 13 marsu 2020 (TATOLI)–Ohin, Prezidente Repúblika (PR), Francisco Guterres Lú Olo, hamutuk ho Primeiru-Ministru, Taur Matan Ruak, Prezidente Tribunál Rekursu no komunidade Metinaro-Dili, kuda ai-parapa oan hamutuk 13.000, iha área tasi-ibun Metinaro, atu kontinua intensifika kampaña nasionál ” Sidadaun ida, ai-oan ida”.

Iha diskursu, Prezidente Repúblika hateten ho laran ksolok tebe-tebes bele mai Metinaro, iha ámbitu kampaña nasionál “sidadaun ida, ai-oan ida”, ne’ebé lansa iha 25 janeiru 2019.

“Kampaña Nasional “Sidadaun ida, ai-oan ida” hanesan dalan ida hodi dada atensaun husi timoroan hotu-hotu atu haree ba sidadaun ida-idak no hamutuk nu’udar forsa-metin ida de’it, hodi bele kaer metin hakarak koletivu ida de’it: Maka hamatak rai atu garante ambiente furak no saudável ba jerasaun ohin-loron no tuirmai”, Prezidente Repúblika Lú Olo hateten.

Aman nasaun ne’e apela katak sidadaun hotu-hotu iha devér atu kontribui ba hala’o polítika ida-ne’ebé fó dalan ba dezenvolve ekonomia saudável ida.

“Ita iha ona ezemplu balun iha munisípiu sira, husi sidadaun sira, ne’ebé responsável, badinas no kriativu hodi kontribui ba hamatak, lalais liu, ita-nia rai doben ida-ne’e. Ha’u hakarak temi ezemplu espesiál ida husi ita-nia maluk feto potensial ida, Señora Leopoldina Guterres, husi Postu Administrativu Baguia, Baucau. Ohinloron, Leopoldina mak koordena hela atividade kuda ai-horis hala’o husi Fundasaun “Ho Musan Ida”. Fundasaun ne’e servisu hamutuk ho Xpand Fundasaun, husi Austrália, no iha tinan sanulu nia laran, baguiaoan sira kuda ona ai-horis rihun 200. Inisiativa ida-ne’e mobiliza sidadaun sira iha komunidade laran, no nune’e, baguiaoan sira, ho sira-nia kbiit rasik, bele mós hala’o programa internasionál kuda ai-horis hodi kapta karbonu”, nia tenik.

“Iha prosesu kapta gás dióksidu karbonu husi ambiente no armazena karbonu ba sira-nia moris, ai-hun sira hamoos ambiente. Inisiativa kuda ai-horis fó ona impaktu pozitivu iha Baguia tanba ajuda rekupera floresta tuan no bee-matan rua ne’ebé maran kleur tiha ona. Hamosu mós floresta foun no, nune’e, baguiaoan sira bele iha klima saudável, rai-bokur ba agrikultura, bee-moos no agrikultór ida-idak bele hetan rendimentu anuál husi ai-hun ida-idak ne’ebé ida-idak kuda, liuhusi programa internasionál fa’an no sosa karbonu armazena iha ai-hun ida-idak. Ita presiza halo tuir esperiénsia baguiaoan sira-nian, iha suku ida-idak”,PR Lú Olo hatutan.

Xefe Estadu ne’e hateten, ohin, tuir Prezidente Repúblika ninia kompromisu rasik, halibur-malu iha ne’e hodi promove Dezenvolvimentu Sustentável liuhusi atividade kuda ai-parapa. Ho atividade kuda ai-parapa ka ai-tasi, sidadaun ida-idak hadi’ak daudaun meiu-ambiente iha fatin importante ida ba animál sira ne’ebé baibain moris iha ne’ebá no ba vida komunidade nian, liuliu ba sira ne’ebé moris besik tasi-ibun ka depende liuliu husi tasi ba sira-nia moris.

“Área ai-parapa nian menus ba beibeik. Tuir dadus ne’ebé iha, iha tinan 1940, ai-tasi iha Timor-Leste laran tomak okupa maizumenus ektár 9000. Maibé, ohinloron, ita iha de’ it ona área ai-tasi ektár 1300. Ida-ne’e preokupasaun boot ida no sidadaun hotu-hotu tenke ajuda rekopera área ai-parapa nian. Área ai-parapa nian menus ba beibeik tanba ita la hatene katak área ne’e iha funsaun oin-oin: satan laloran no anin boot, la husik fo’er tama iha tasi laran; fó ambiente di’ak ba animál oin-oin moris no dezenvolve iha ne’ebá no bele sai fonte rendimentu di’ak ida ba ita-nia ema ne’ebé depende liluliu husi peska”, Xefe Estadu dehan tan.

Maibé, área ai-parapa nian, ne’ebé importante atu fó nafatin benefísiu temi iha leten, Xefe Estadu dehan, nakfilak ba to’os no natar no área haki’ak ikan ka halo masin; populasaun, tesi arbiru hodi te’in; halo uma iha ne’ebá arbiru de’it; fo’er husi mota no husi uma aumenta ba beibeik iha área sira-ne’e. Husi hahalok aat sira-ne’e, poluisaun aumenta iha área sira ne’e no vida animál no ai-parapa nian tama iha risku. Setór peska no turizmu mós sei lakon nia valór ekonómiku.

“Bainhira ita kuda ai-parapa ita hamenus risku no prejuízu sira temi iha leten.Nune’e, maluk doben sira, mai ita hotu hamutuk fó ita-nia kontribuisaun hodi hadi’ak ita-nia meiu-ambiente. Sidadaun ida-idak kuda ain-oan ida no, ida-idak, hosi ohin ba oin, tenke filafali mai fatin ida-ne’e no beibeik, hodi garante katak ai-oan ne’ebé kuda ohin, sei boot no buras ba beibeik. Rezultadu di’ak, hosi atividade ohin nian, sei fó benefísiu ba ita-nia an rasik no ba ita-nia oan no beioan sira”, PR Lú Olo konvida.

Ikusliu, Xefe Estadu hato’o obrigadu barak ba ema hotu nia kolaborasaun no apoiu.

“Hamutuk ita kontribui ba protesaun no konservasaun flora no fauna, defende ekosistema, proteje ita-nia ambiente husi poluisaun, hamenus gás dióksidu karbonu iha meiu-ambiente no hadi’ak ba beibeik kualidade vida ba ema hotu. Kuda ai ne’e sai investimentu ida husi beiala sira mai ita no husi ita ba jerasaun sira tuirmai”, PR Lu Olo agradese no enkoraza sidadaun hotu.

Partisipa iha kuda ai-parapa oan ne’e, Primeiru-Ministru (PM), Taur Matan Ruak ho espoza, Prezidente Tribunál Rekursu (PTR), Deolindo dos Santos ho espoza, membru Parlamentu Nasionál, membru Oitavu Governu Konstitusionál, eis titulár-sira, korpu diplomátiku, Komandante Jerál PNTL, Xefe Estadu Maiór Jenerál F-FDTL, estudante-sira no hetan seguransa másimu husi PNTL no F-FDTL.

Iha tempu ne’ebé hanesan, ekipa Prezidénsia Repúblika mós kuda ai-oan iha Beacou, Bobonaro no Ulmera, Liquiçá.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here