DILI, 13 marsu 2020 (TATOLI) – Arguidu ho inisiál JCR arrepende ho nia hahalok iha Tribunál Distritál Dili (TDD) tanba lori fali katana modelu “samurai” hodi ameasa atu taa nia-inan no nia-feton rasik.
Lezada ho inisiál MFRF nu’udar arguido nia-inan no lezada JN nu’udar arguidu nian-feton triste tebes ho arguidu nia hahalok lori fali kro’at ameasa sira nain rua no lori forsa atu duni-sai sira na’in rua hosi uma ne’ebé durante ne’e sira moris hamutuk nu’udar família ran-ida no abut-ida.
Liuhosi audiénsia julgamentu, ohin, iha TDD, Prokuradór Ricardo Leite lee sai depoimentu Ministériu Públiku nian katak, iha loron 02 jullu 2019 iha Kuluhun, Dili, arguidu JCR lori “samurai” atu taa lezada MFRF ho JN iha sira nia hela fatin iha Kuluhun. Nia mós duni lezada sira sai hosi uma tanba arguidu dehan, lezada sira la iha direitu atu hela iha uma refere tanba sira nia-aman mate ona.
Iha deklarasaun arguidu JCR nian katak momentu ne’ebá nia lori “samurai” ameasa de’it, la’ós taa tanba nervozu rona fali lezada JN nia katuas-oan hakilar fali hasoru nia.
“Ha’u ba ho intensaun atu husu didi’ak ba lezada JN nia katuas-oan, nu’udar ha’u nia ria, maibé ha’u nia mama hateten fali mai ha’u katak ha’u atu ba hadau rai. Ne’e mak ha’u nervozu lori “samurai” ameasa-sira. Mas, la iha intensaun atu taa-sira,” esklarese arguidu JCR ba Tribunál.
Ho aktu arguidu nian ne’e, Ministériu Públiku akuza arguidu ho prátika krime ofensa integridade fízika simples ne’ebé previstu iha artigu 145 kódigu penal Timor-Leste.
Rona-tiha deklarasaun hosi parte-sira, tribunál liuhosi Juiz singulár Sribunana da Costa, deside adia hikas fila-fali julgamentu ne’e ba iha loron 03 abríl 2020, tuku 14:30 Itl, hodi rona desizaun.
Iha audiénsia julgamentu ne’e, arguidu JCR hetan defeza ka asisténsia legál hosi advogadu privadu Miguel Fária.
Jornalista : Nelson de Sousa
Editór : Francisco Simões