Kondisaun ikus atividade apredijazen estudante Eskola EBF Aiasa, Balibo ne'ebe anin sobu, foin lalais ne'e. Imajen/Antonio Goncalves

DILI, 13 marsu 2020 (TATOLI)-Koordenadór Eskola Bázika Filiál Ai-Turilaran, Vidal dos Santos hateten, nia parte dadaun ne’e enfrenta hela problema menus sala ba estudante sira hodi difikulta prosesu aprendijazen lorloron nian.

EBF Ai-Turilaran iha alunu sira  hamutuk 907, maibé eskola ne’e iha de’it sala aprendijazen ba estudante hamutuk 10. Tanba ne’e maka eskola tenke foti desizaun hodi hamenus oras hanorin ba estudante hosi klase I no II.

Ami tenke redús oras rua iha prosesu ensinu aprendijazen ba estudante primeiru no segundu anu sira tanba limitasaun sala de aula. Ne’e duni sira tama dader tuku 8:00 sai fali tuku 10:30 depois tuku 11:00 tama fali sai 13:30,”dehan Koordenadór Eskola Públika ne’e ba TATOLI, iha ninia servisu fatin, kinta (12/03/2020).

Ho limitasaun sala ne’ebé iha, profesór sira tenke fahe oras hanorin iha dader, meudia, no lokoraik. Kada sala akumula estudante 40, maibé tuir nia ideál ne’e kada sala akumula estudante másimu 30.

Nia esplika maske antes ne’e, ekipa hosi Ministériu Edukasaun Juventude no Desportu halo ona estudu viabilidade atu aumenta sala maibé to’o oras ne’e seidauk implementa.

“Parte eskola hanoin atu aumenta tan aula maibé presiza ko’alia ho diretór ensinu báziku inklui Ministeriu hodi haree kondisaun rai no mós estudu ruma, maibé Ida ne’e de’it to’o agora seidauk,”tenik tan.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here