DILI, 13 marsu 2020 (TATOLI) – Prezidente Asosiasaun Tane Konsumidór, António Ramos da Silva, informa durante dulan-tolu nia laran, TANE Konsumidór rejista kazu reklasaun husi konsumidór hamutuk 10 no rua konsege halo ona denúnsia ba Autoridade Nasionál Petróliu no Minerál (ANPM).
“Iha janeiru to’o marsu, ami iha ona kazu pur volta sanulu no iha kazu balun ne’ebé ami tun rezolve hanesan iha loja xineza sira ne’ebé maka la taka folin sasan no uza lian xina,”, dehan António Ramos ba Agência Tatoli iha ninia knaar fatin, Villa-Verde, sesta ne’e.
Iha loja xineza rasik, kona-ba kestaun informasaun ba folin sasán, hanesan label sira ne’e tenke sira taka entaun ne’e difikulta konsumidór atu asesu no ida-ne’e kategoria viola lei protensaun konsumidór nian no ba publisidade iha loja xineza sira ne’ebé hakerek folin sasan $1 to’o $10.
“Ami haruka sira hadi’a tanba imposível sasán sira ne’ebé sira maka fa’an ho folin $1 to’o $10.”, nia realsa.
Nune’e mós, ba kazu estabelesimentu konbustível rua konsege halo ona denúnsia ona.
“Kazu ne’ebé ami denúnsia maka kazu mina no gás iha estabelesimentu kombustível rua, reklasaun iha Dili laran, iha sentru kombustível no daudaun ami submete ona ba ANPM atu toma atensaun”, nia dehan tan.
Alende ida-ne’e, kona-ba kazu seluk hanesan reklasaun konsumidór sira, TANE rejista maka kona-ba eletrisidade mate lakan no billete aviaun ne’ebe kontinua sae.
Tuir António katak TANE ninia servisu mós halo hela edukasaun sívika kona-ba divulgasaun informasaun no ba lei folin sasan sira, nune’e operadór ekonómiku sira bele kumpre liuliu ba sasán sira ne’ebé tenke uza lian tetun taka prazu liu, nune’e fásil ba konsumidór atu hatene.
“Dala-barak ita halo tiha maibé menus sosializasaun ba ita-nian negosiate sira, tanba ne’e sempre mosu dezentementu entre kompradór no kosumidór maibé ami halo sosializasaun ba lei sira ne’e no parte ida atu tulun parte rua bele komprende malu”, nia subliña tan.
Jornalista: Natalino Costa
Editora: Julia Chatarina
