Xefe Bankada CNRT, Duarte Nunes. Imajen Tatoli/Egas Cristóvão

DILI, 12 marsu 2020 (TATOLI)—Xefe Bankada Parlamentár Partidu Congresso Nacional de Recosntrução Timorensse (CNRT), Duarte Nunes hateten, iha vida polítika ne’e normál tanba bainhira la intende malu ona tenke simu konsekuénsia fahe-malu iha kualkér koligasaun.

“Polítika ne’e, ohin ita hamutuk, aban ita la gosta malu no fahe malu ne’e normál. Kuandu ita intende malu ita la’o hamutuk, la intende malu ita fahe-malu. Tanba, ita fó hatene tribunál katak ne’e koligasaun pre-eleitorál,” dehan Duarte Nunes ba jornalista sira iha resintu Parlamentu Nasionál, ohin.

Nia informa, koligasaun foun ne’ebé forma hosi partidu neen (6) ho kadeira 34 ne’e bele garante estabilidade governativa tanba lei fó dalan kadeira 33 mós bele, naran jestór mak tenke hatene.

Xefe Bankada CNRT ko’alia kestaun ne’e hodi hatán ba Vise-Xefe Bankada Parlamentár Partidu Libertasaun Populár (PLP), Francisco Vasconselhos, konsidera Congresso Nacional de Reconstrução Timorensse (CNRT) laiha konsisténsia polítika.

Antes ne’e, Vise-Xefe Bankada Parlamentár PLP, Francisco Vasconlelos hateten, uluk problema VIII Governu Konstitusionál nian mak lista membru Governu peendente kuaze la’o besik tinan-ida, tanba ne’e mak CNRT ezije hela de’it lista pendente tenke buka solusaun.

Nia dehan, iha altura ne’ebá bankada AMP ba hasoru Prezidente Repúblika tanba iha opiniaun balu deskonfia Prezidente Repúblika ho Primeiru-Ministru ‘futu-lia’, entaun hasoru prezidente hodi husu tetu fila-fali

Nia haktuir, iha altura ne’ebá Prezidente dehan lista pendente ne’e haluha tiha no ajuda Primeiru-Ministru lori solusaun .

Hahú hosi ne’ebá, Vise-Xefe Bankada PLP ne’e dehan, lista ema na’in-hitu ne’e sira (CNRT) ladún ko’alia ona maibé ko’alia ona kona-ba projetu no kargu xefia sira, ne’e CNRT foti asuntu sira-ne’e iha nível AMP nian.

Nia argumenta, proposta lei OJE ho montante Biliaun 1.950 ne’e CNRT konsidera boot liu, kontra Lei Jestaun Finanseira no estrutura orsamentu latuir regra, entaun haruka governu dada orsamnetu no governu halo tuir no redús tiha lori fila-fali mai. Argumentu seluk mak mosu dehan governu la’o ho ain-kudeik no Primeiru-Ministru sobu sistema.

“Ne’e PLP nota katak CNRT laiha konsisténsia polítika tanba na’in-hitu ne’e la ko’alia ona dehan Primeiru-Ministru sobu sistema no governu la’o ho ain-kudeik. Agora sistema ida-ne’e mak governu sobu. Tuir ha’u-nia hatene durante enkontru AMP nian problema ne’ebé sira husu Primeiru-Ministru halo rezolusaun hodi halakon tiha Unidade Planeiamentu, Monitorizasaun no Avalisaun (UPMA). Ne’e la’ós sobu sistema, sistema ne’ebé iha uluk sira mak harii iha VI Governu nia tempu,” Xefe Bankada Parlamentár PLP, Francisco Vasconselos, informa liuhosi konferénsia imprensa, iha Parlamentu Nasionál, kinta ne’e.

Vise-Xefe Bankada PLP ne’e espera koligasaun foun ne’ebé lidera hosi CNRT bele fó solusaun lalais ba impase ne’e.

Nia afirma, aprezentasaun kandidatura iha pre-eleitorál iha implikasaun barak, tanba kuandu Aliansa Mudansa ba Progresu ne’e la eziste ona, entaun lei partidu polítiku ne’e CNRT la’ós segundu mais votadu ona.

“Agora problema ida ba sira mak ne’e sira buka para prenxe rekezitu de’it, 34 kadeira, ida foin lalais ne’e 36, CNRT mós iha laran. Entaun, tanbasá mak husik tiha ida-ne’e ba fali seluk,” nia kestiona.

Nia dehan, partidu CNRT mak vota kontra orsamentu tanba uluk formasaun governu, problema AMP nian mak lista pendente, kuaze la’o besik tinan ida.

Notísia Relevante: PLP Konsidera Koligasaun Indijita PM Laiha Baze Legál

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here