TradeInvest Timor-Leste. Imajen/Espesiál

DILI, 12 marsu 2020 (TATOLI)Diretór Promosaun Investimentu TradeInvest Timor-Leste, Izaquel da Costa Babo, informa durante tinan-2019 instituisaun ne’e konsege atribui sertifikadu investimentu espesiál ba empreza tolu ne’ebé halo investimentu ho kapitál boot.

“Iha tinan-2019 Ami emite sertifikadu investimentu ba Timor Port  ne’ebé halo investimentu iha área Tibar, kompostu husi parseiru setór publiku (Governu) no mós envolve setór privadu seluk, Empreza Ami husi Austrália ne’ebé halo investimentu ba prosesamentu industria bee nia, no ikus liu maka Sentrál Moris  ne’ebé halo investimentu iha setór pekuária ninian”, tenik Izaquel ba Agência Tatoli iha ninia knaar fatin, Colmera, kinta ne’e.

Nia realsa, kapitál investimentu Timor Port hamutuk millaun $300-resin, Empreza Ami hahú investimentu ho kapitál millaun $6,5 no Sentral Moris ho kapitál millaun $4,2.

Maski nune’e, nia subliña, daudaun ne’e empreza Pelican Paradise maka iha kapitál investimentu boot liu ho montante millaun $700.

Nia haktuir, TradeInvest Timor-Leste atribui ona sertifikadu investimentu ba Pelican Paradise iha tempu VII Governu Konstitusionál iha tinan-2018 no to’o agora emite ona sertifikadu hamutuk sanulu ba Pelican Paradise.

Nia adianta, Pelican Paradise hahú ona investimentu faze dahuluk.

“Sira agora hahú daudaun investimentu iha área Tasi-Tolu, maibé tuir loloos sira tenke asina akordu espesiál investimentu ho TradeInvest. Maibé sira iha kompromisu boot hodi hahú faze dahuluk investimentu”, hateten Izaquel.

Nia subliña, investimentu ne’ebé maka empreza Pelican Paradise halo, kategoriza ba faze rua, ne’ebé faze dahuluk hahú uluk ona apartementu ho investimentu hamutuk millaun $110.

“Agora sira hahú halo faze dahuluk iha Estatua Amo Papa ninia sorin no  fase daruak sei akontese hafoin Governu rezolve okupante sira área atu hahú obra”, nia akresenta.

Enkuantu, tuir Izaquel iha tinan-2019, TradeInvest Timor-Leste simu proposta investimentu ne’ebé maka Governu aprova no rejista porsentu 84 mai husi empreza estranjeiru no porsentu 16 mai husi empreza nasionál.

“Proposta investimentu ne’ebé aprova iha tinan-2019, barak liu mai husi empreza estrajeiru kompara ho empreza nasionál”, nia salienta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here