Responsável AIFAESA hamutuk ho entidade relevante, halo konferénsia imprensa hodi fó sai rezultadu teste laboratóriu manu-tolun. Imajen Tatoli/Natalino Costa

DILI, 12 marsu 2020 (TATOLI) Ekipa operasaun Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,IP), hamutuk ho Ministériu Saúde (MS) no Diresaun Nasionál Veterinária, Ministériu Agrikultura no Peska (MAP), halo teste ba amostra manu-tolun iha laboratóriu diagnóstiku ai-han no na’an, hetan rezultadu negativu ka la hatudu indikasaun iha matéria plástiku.

Teste ne’e relasiona ho kazu manu-tolun falsu (plástiku) ne’ebé sirkula iha tinan kotuk no sai preokupasaun iha públiku.

Nune’e, parte AIFAESA liuhosi Departementu Planeamentu Operasionál Risku Alimentár Laboratóriu (DPORAL), halo kedan koordenasaun ho entidade sira ne’ebé maka iha laboratóriu hodi hamutuk hala’o teste laboratóriu.

Diretór DPORAL AIFAESA, Angelo Edmundo Belo, informa teste ne’e bazeia ba reklamasaun komunidade ba empreza lokál balun.

“Ami halo kolleta ba amostra husi empreza ne’ebé halo produsaun manu-tolun iha Postu Administrativu Railaco, Munisípiu Ermera no Loes, hodi hatene kle’an kona-ba situasaun manu-tolun falsu ne’ebé tuir reklamasaun komunidade sira”, tenik Dirijente ne’e liuhosi Konferénsia Impresa kona-ba rezultadu laboratóriu iha edifísiu AIFAESA, Matadoro, kinta ne’e.

Nia refere liután kona-ba rezultadu ne’ebé maka iha, hetan konkluzaun katak laiha manu-tolun ne’ebé falsu.

“Signifika hafoin halo analiza laboratóriu ba amostra manu-tolun ne’ebé ami foti, la hatudu  katak ai-faan ne’e falsifikadu ka plástiku”, nia akresenta.

Angelo Edmundo subliña, amostra ne’ebé maka  parte laboratóriu diagnóstiku halo bazeia ba sasukat hanesan haree liu ba kualidade no seguransa rasik, inklui kontaminasaun balun husi manu-tolun ne’e rasik.

“Ita haree kona-ba kualidade husi parte li’ur, iha manu-tolun ninia kinur, mutin no kulit”, nia salienta.

Iha sorin seluk, Xefe Departementu Laboratóriu Diagnóstiku Veterinária MAP, Felisiano da Conceição, hateten Veterinária MAP ninia papél maka halo dignóstika ba kualidade manu-tolun no fó sai rezultadu.

Iha tinan-2019, AIFAESA servisu hamutuk MS no MAP halo inspesaun ba manu-tolun ne’ebé maka mai husi  kompañia Gracia Farm no Happy Farm tanba iha reklamasaun husi populasaun katak manu-tolun ne’ebé empreza prodús ne’e plástiku.

“Hafoin ami halo inspesaun tuir estandarte ne’ebé maka nasaun barak aplika iha laboratóriu, hatudu katak manu-tolun ne’ebé ita prodús iha rai-laran la indika falsu. Momentu ne’ebá ami halo mós teste ba kontaminasaun no ami halo analiza battériu, la indika katak manu-tolun ne’e kontaminadu”, Felisiano esplika.

Nune’e, nia rekomenda ba parte produtór manu-tolun sira karik distribui ba ditributór sira tenke hatene jere ho di’ak.

“Distributór maka iha problema oituan tanba sira la rai iha temperatura di’ak. Nune’e kuandu haree kualidade manu-tolun atu di’ak ka lae, kolega distributór sira tenke hatene. Tuir rekomendasaun sientífiku sira tenki rai iha temperatura 30”, nia informa.

Nia husu ba komunidade sira, kuandu hetan manu-tolun laiha kualidade tenke informa ba AIFAESA, nune’e bele haruke ekipa tun hodi foti amostra lori ba teste, tanba kestaun hirak ne’e bele afeta ba ema-nia vida, liuliu ba seguransa ai-han.

Nune’e mós, kordenadór Jerál AIFAESA, Abílio Oliveira Serano husu ba públiku atu kontinua koopera ho AIFAESA karik ba loja maka hetan manu-tolun laiha kualidade no haree hanesan plástiku, tenke informa ba autoridade ne’e hodi ekipa sira bele tun no lori amostra ba teste hodi hatene loloos rezultadu ai-han ne’e.

“Ami ba oin sei kontinua koopera ho institusaun relevante ne’ebé iha laboratóriu atu haree ba kestaun sira ne’e. Tanba ne’e, husu ba públiku labele pániku kuandu hetan produtu laiha kualidade no tenke reklama ba AIFAESA atu halo intervensaun”, nia realsa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here