Atividade ekipa tékniku EDTL iha terrenu. Imajen Tatoli/António Gonçalves

DILI, 12 marsu 2020 (TATOLI) – Diretór Ezekutivu Luta Hamutuk, José Alves da Costa, hateten dezde uluk kedan Organizasaun Naun Governamentál (ONG) ne’e sujere ona Governu halo transformasaun Eletricidade de Timor-Leste (EDTL) ba Empreza Públika, nune’e bele jere rasik ninia finanseira no hamenus burokrasia hodi fornese eletrisidade ba konsumidór ho di’ak no kualidade.

“Ami Luta Hamutuk fó apoiu ba transformasaun ne’e tanba iha pasu pozitivu hodi loke dalan ba EDTL atu hetan lukru no bele mós fornese eletrisidade ho di’ak ba konsumidór sira ho sustentabilidade”, tenik José Alves ba Agência Tatoli iha ninia knaar fatin, Faról, kinta ne’e.

Tuir Dirijente ne’e, bainhira EDTL sai ona Empreza Públika bele fó vantajen ba Estadu Timor-Leste tanba bele halo jestaun rasik ho independente no laiha intervensaun husi Governu bainhira halo manutensaun regulár ruma iha liña disitribuisaun.

Notísia Relevante: Governu Deside EDTL Sai Empreza Públika

Nia refere liután kona-ba rekursu umanu, nia fiar katak funsionáriu ne’ebé daudaun servisu iha EDTL iha ona kapasidade natoon atu jere rasik instituisaun ne’e.

“Ita-nia rekursu umanu natoon ona no mesak timoroan, ne’ebé transformasaun ne’e mós sai sasukat ba EDTL atu esforsu-an hodi hasa’e kapasidade rekursu umanu hodi fó naroman ba ita-nia populasaun sira”, nia akresenta.

Ho nune’e, nia adianta, Luta Hamutuk laiha dúvida ba transformasaun EDTL ba tanba ho meiu ida-ne’e maka bele garante sustentabilidade sistema distribuisaun eletrisidade iha Timor-Leste.

“Liuhosi tranformasaun mak EDTL bele hetan rendimentu di’ak hodi labele depende demais ba Orsamentu Jerál Estadu”, nia argumenta.

Iha sorin seluk, Ofisiál Programa no Koordenadór Rede Asia Justice and Rights (AJAR), Inocêncio de Jesus Xavier, iha hanoin ida katak transforma EDTL ba Empreza Públika fó vantajen tanba nu’udar empreza estatál ida, bele jere rasik ninia finanseira no administrativamente bele hola desizaun polítika rasik atu fó atendimentu ba públiku.

“Ita hein katak aprovasaun ba tranformasaun ne’e bele lori naroman ba povu-sira no kontribui ba dezenvolvimentu ekonomia atu investidór estranjeiru no nasionál bele investe,” nia adianta.

Tuir nia, daudaun ne’e dezenvolvimentu ekonomia no infraestrutura depende ba eletrisidade, tanba ne’e tenke garate liña distribuisaun atu ahi labele mate lakan.

Maski nune’e, nia mós rekoñese ekipa tékniku sira seidauk iha kapasidade natoon hodi kontrola liña transmisaun, ne’ebé presiza rekrutamentu ba ema ne’ebé iha kapasidade profisionál iha área eletrisidade.

Nune’e, nia rekomenda ba EDTL atubele harii mós loja ba fasilidade elétriku nian hodi konsumidór sira bele ba sosa no harii mós sukursál atubele fa’an pre-pagu iha munisípiu to’o nível aldeia hotu atu fasilita konsumidór sira.

Nune’e mós, Estudante Universidade Nacional Timor Lorosa’e (UNTL), Ferminia Pinto, iha esperansa ba mudansa transformasaun EDTL ba Empreza Públika ne’e bele hasa’e kualidade atendimentu hodi fornese eletrisidade ba populasaun tomak.

Entretantu, Konsellu Ministru aprova ona Dekretu-Lei ba kriasaun Eletricidade de Timor-Leste, Empreza Públika (EDTL,EP) no kria Autoridade Nasionál ba Eletrisidade, ho intensaun  transforma EDTL husi departementu govermentál ba Empreza Públika bele hamenus burokrasia no hasa’e prestasaun servisu ho kualidade ba fornese eletrisidade.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here