Jogadór Juvenil AS Ponta Leste. Imajen Tatoli/ Hortençio Sanchez

DILI, 12 marsu 2020 (TATOLI)-Asistente Treinadór Selesaun Nasionál U-19, Francisco de Araújo informa preparasaun ba jogadór U-19 hosi Timor-Leste hodi partisipa iha kompetisaun jogu ASEAN Footbal Federation (AFF) Cup ne’ebé sei realiza iha fulan-juñu 2020 iha Indonézia atinje ona porsentu 50.

“Fiar katak iha fulan hirak mai ne’e ami bele atinje ona ba pursentu 80 bele mós to’o pursentu 100, agora dadaun jogadór hamutuk 18 maibé ami haree hela atu hatama tan jogadór na’in lima para bele kompleta 23, jogadór sira ne’e ami haree ona,”informa Asisténte Treinadór ne’e ba TATOLI, iha edifísiu Federasaun Futeból Timor-Leste (FFTL), Dili kinta (12/03/2020).

Atu prepara fíziku jogadór sira, Nia husu ba FFTL atu responde ona sira-nia proposta orsamentu ne’ebé antes ne’e submete ona hodi fasilita treinamentu ba jogadór sira.

“Atu bele atinje objetivu FFTL maka tenke responde ho di’ak ami nia proposta sira ne’ebé hatama ona ba sira hanesan hahan ba jogadór sira, be’e hemu jogadór sira-nian, jogadór sira tenke ba treinu GYM hodi hasa’e forsa nune’e bele aumenta sira-nia forsa fíziku tanba ita-nia kogadór sira maioria iha velosidade di’ak maibé laiha forsa atu soke, maibé foin lalais ami konsege ba duni GYM hodi utiliza métodu ida ne’e agora di’ak uitoan,” nia hateten.

AFF Cup 2020 sei partisipa hosi nasaun membru sira iha rejiaun Sudeste Aziátiku hanesan Indonézia, Malázia, Veitname, Thailandia, Filipina, Laos, Kambodia, Mianmar, Brunei Darusalam no Singapura.

Iha AFF Cup 2019 liubá ne’ebé realiza iha Indonézia, Timor-Leste konsege hakat to’o final.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here