Xefe Bankada CNRT, Duarte Nunes. Imajen/Egas Cristovão

DILI, 12 marsu 2020 (TATOLI)—Xefe Bankada Parlamentár CNRT, Duarte Nunes hateten, Partidu Libertasaun Populár kestiona indijitasaun Primeiru-Ministru hosi koligasaun foun maibé Partidu Congresso Nacional de Reconsstrução Timorense (CNRT) entrega ba Prezidente Repúblika, Francisco Guterres ‘Lú Olo’, hodi foti desizaun tanba ida ne’e PR nia kompeténsia.

“Podér ne’e iha Prezidente Repúblika nia liman. Tanba kuandu Primeiru-Ministru hato’o ona nia pedidu demisaun, signifika nia hatene situasaun no nia hakarak kontribui situasaun ne’e bele hetan solusaun. Nune’e mós ba indijitasaun Primeiru-Ministru ne’ebé koligasaun aprezenta ona,” dehan Xefe Bankada Parlamentár CNRT, Duarte Nunes, ba jornalista sira iha resintu Parlamentu Nasionál, ohin.

Xefe Bankada CNRT ko’alia kestaun ne’e hodi fó resposta ba Vise-Xefe Bankada Parlamentár PLP, Francisco Vasconselhos, ne’ebé kestiona baze legál kona-ba koligasaun foun indijita Primeiru-Ministru, asuntu demisaun no destituisaun ba meza parlamentu nasionál.

Nia afirma, PM mós intensaun di’ak no entrega ba prezidente, tanba lei mak hateten halo pedidu demisaun ba prezidente mak prezidente sei dekreta maibé desizaun iha prezidente nia liman.

“Se dehan gople estadu entaun tribunál mak sei deside. Agora, ema halo golpe ho asaun armada ne’e buat seluk. Ida polítika ne’e tribunál iha para deside. Ha’u dehan ne’e husik tribunál mak deside. Ita-nia rain ne’e lei-na’in sira mós barak, halo lei mós barak, asina lei mós barak. Prontu, ida-idak bele interpreta tuir ida-idak ninia matenek. Ne’ebé, sé-sé mak ko’alia, ami respeita,” nia dehan.

Xefe Bankada CNRT ne’e hateten, situasaun oras ne’e idak-idak dada hanesan boraxa be dada ba-mai de’it.

“Ha’u hatene, agora ne’e idak-idak dada boraxa. Ita hamriik dada boraxa ne’e ita atu hamriik ba to’o ne’ebé,” dehan Xefe Bankada Parlamentár CNRT ne’e.

Nia hatutan, kona-ba destituisaun ba meza Parlamentu Nasionál sei tuir konjuntura polítika atuál no sei hein proposta mai karik ema hotu simu tanba iha parlamentu ne’e kolejiál. Kuandu iha maioria ona entaun maioria ne’e mak sei deside, ne’ebé hein de’it.

“Ha’u labele hatán ema idak-idak nian. Maibé, ita sei iha tribunál, ita espera katak tribunál iha kondisaun atu halo interpretasaun ne’ebé ke di’ak para ita hotu uza hodi hola desizaun polítika ne’ebé ita-nia rai presiza. Se lae, ita dada-malu hanesan ita la ba-oin,” nia hateten.

Notísia Relevante: PLP Konsidera Koligasaun Indijita PM Laiha Baze Legál

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here